Sulejman Starova është një nga 3 kandidatët që do të garojë për postin e presidentit të FSHF-së. Në zgjedhjet e 2 marsit, “Bobi” do të jetë në garë me presidentin aktual, Armand Dukën dhe Shakohoxhën për postin e presidentit të Federatës, ndërsa i ftuar në emisionin “Skaner” ai ka falenderuar klubet dhe Shoqatat që e propozuan.
Starova është treguar i sinqertë duke thënë se presidenti aktual i FSHF-së, Armand Duka është i avantazhuar në këto zgjedhje pasi familja e futbollit është e kënaqur nga puna e tij si dhe ka bërë një arritje të madhe duke qenë anëtar i KE në UEFA.
“E kam thënë që kam një jetë që merrem me futboll dhe do e bëj sa të kem frymën. Është koha për të paraqitur programe si do e dërgojmë futbollin përpara. Duka është i avantazhuar, pasi duket se familja e futbollit është e kënaqur nga puna e tij. Arritje është edhe qenia si anëtar i KE në UEFA. E rëndësishme është që të paraqesim një program që futbolli të ecë përpara.
Përfitoj nga rasti klubet që Shoqatat që bënë të mundur kandidimin tim. E rëndësishme është që programi, me ose pa mua, të realizohet me ato që unë pretendoj. Anëtarët janë në dijeni të programit që kam unë”, u shpreh Starova.
