Ish-kryeministri, Sali Berisha, prezantoi këtë të premte kandidatin e koalicionit “Shtëpia e Lirisë” për Bashkinë e Durrësit, Ardian Muka.
Gjatë fjalë së tij ai denoncoi betonizimin e qytetit bregdetar, të cilin sipas tij e bekoi Zoti por e shkatërron dita-ditës betoni.
“Shqipëria dhe shqiptarët sot e kanë jetik ndryshimin. Nëse i hedh një vështrim kësaj treve, këtij qyteti, portit, trashëgimisë mahnitëse historike të qytetit, vështirë se mund të gjesh kund një territor në të cilin natyra dhe Zoti të kenë qenë më bujar se me Durrësin. Me gjithë këtë, shtatin mijëravjeçar të këtij qyteti të mrekullueshëm, brigjet e tij i gërryen çdo ditë jo erozioni por betoni. Betoni nga lakmia, babëzia e papërmbajtur e një grupi njerëzish që i janë përveshur Durrësit në kurriz dhe duan të pasurohen me çdo kusht duke i varrosur pasuritë e tij përrallore, duke i ngushtuar dhe zaptuar të gjitha hapësirat e tij, duke i shndërruar plazhet e tij mahnitëse në zona udhëtimi horror siç do më thoshte një i huaj disa vite më parë për plazhin e Durrësit. Ndërsa vija këtu, pak metra nga kjo ndërtesë ishte hoteli dikur krenaria e qytetit, sot ikonë e veprimit të krimit mbi qytetin”,- shprehet Berisha.
