Zbardhet skema e mashtrimit të shtetasve të huaj nga 32-vjeçari Olti Ferhataj, nëpërmjet një aktiviteti call center. I riu sipas policisë u prezantohej të huajve si agjent burse dhe u kërkonte para për t’i investuar në kriptomonedha dhe Forex.
Hetuesit bënë ndalimin e 32-vjeçarit pas denoncimit të një shtetasi italian të cilit i janë marrë mbi 100 mijë Euro. Ferhataj ka treguar para hetuesve se i ka marrë fillimisht shumën prej 50 mijë Eurosh, dhe i ka kthyer 56 mijë për të krijuar besueshmëri. Më pas italiani ka bërë disa transferta të tjera në llogari bankare në Poloni dhe Estoni, duke menduar se do të fitonte por humbi totalin e parave, 108 mijë Euro. Bashkë me Olti Ferhatajn, janë proceduar penalisht dhe 3 persona të tjerë të cilët dyshohen se janë bashkëpunëtor të të riut.
Ndërkohë në Durrës janë ndaluar dy punonjës të një call center, të cilët gjithashtu përfituan shuma të mëdha parash përmes mashtrimit. Ata janë Frenk Lumi, 26-vjeç dhe Desar Bano, 42 vjeç. Sipas policisë ata telefononin të pasurit në vendet e BE-së duke u prezantuar si përfaqësues të kompanive të mëdha.
Të arrestuarit u ofronin të huajve mundësi investimi në bursë ndërkombëtare, ndërsa funksionin si firmë piramidale. Ata u kërkonin europianëve të depozitonin shuma të caktuara, vlera e të cilave do të rritej për shkak të interesave. Pasi i rikthenin lekët një herë klientit, ata depozitonin vlera më të larta sërish dhe më pas shumat i mbaheshin duke u thënë që humbnin për shkak të rënies së bursave.
/TV KLAN/
