Gjykata Kushtetuese mban sot seancën e tretë publike për shqyrtimin e vendimit të Kuvendit për shkarkimin e presidentit Ilir Meta. Seanca ka nisur që prej orës 10:00.
Përfaqësuesit e presidentit do t’i përgjigjen 72 pyetjeve që i drejtuan gjyqtarët kushtetues dhe Kuvendi si palë kërkuese. Pyetjet lidhen me qëndrimin e mbajtur nga Presidenti para dhe gjatë zgjedhjeve të 25 prillit si dhe me aspektin procedural të vendimit të Kuvendit për shkarkimin e tij.
Në nisje të seancës, kryetarja e Gjykatës Kushtetuese, Vitore Tusha, është shprehur se “Kuvendi na vuri në dispozicion përgjigjet e pyetjeve. Dokumentet e Kuvendit u janë shpërndarë anëtarëve të trupit gjykues dhe një kopje e tyre i është dërguar Presidentit”.
Gjatë seancës së parë të mbajtur të hënën e javës së shkuar, gjykata rrëzoi një kërkesë të presidencës për dorëheqje të disa gjyqtarëve nga shqyrtimi i çështjes, me pretendimin se ata ishin në konflikt interesi apo se u kishte mbaruar mandati.
