Presidenti Ilir Meta u shpreh pas përfundimit të shqyrtimit të çështjes për shkarkimin e tij në Kushtetuese, se i ka kërkuar përfaqësuesve ligjor të përgatisin një padi për falsifikimin e provave nga Kuvendi.
“Sapo falënderova Bledin dhe Katrin, për përfaqësimin me dinjitet dhe profesionalizëm të Institucionit të Presidentit të Republikës. I kërkova të përgatisin menjëherë padinë për falsifikimin e provave nga Kuvendi, të depozituar në Gjykatën Kushtetuese pa asnjë lloj kërkese”, shkruan Meta në një postim në FB.
“Ky skandal shumë i rëndë, duhet të marrë menjëherë përgjigje ligjore! Takohemi shumë shpejt në një komunikim me mediat”, shton ai.
Gjykata Kushtetuese mbylli sot shqyrtimin e çështjes së shkarkimit të Metës, ndërsa vendimi do të publikohet i zbardhur brenda 30 ditëve.
Deputetë socialistë, të pranishëm në seancë si përfaqësues të Kuvendit, argumentuan pse Meta duhet të shkarkohet për shkelje kushtetuese.
Nga ana tjetër, përfaqësuesi ligjor i presidentit Ilir Meta, Bledar Dervishaj, deklaroi për gazetarët pas seancës se Kuvendi, për qëllime politike, depozitoi në gjykatë prova shkresore të manipuluara. Ai lajmëroi se Presidenti ka vendosur t’i drejtohet prokurorisë lidhur me këtë çështje.
