GJKKO kalon për gjykim themeli dosjen penale ndaj Erion Alibej, i akuzuar si porositësi i dy vrasjeve në Elbasan, atë të Emiljano Ramazanit dhe Rigels Runajt.
Viktimat dyshoheshin për përfshirje në vrasjen e të vëllait Endrit Alibej në një atentat mafioz në dhjetor të vitit 2018. Erion Alibej njihej edhe me emrin Andrea Alibej (Dylgjeri) dhe dyshohet të jetë i implikuar në vrasjen e Bujar Çelës, vëllait të Talo Çelës.
Gjykata e Posaçme për Korrupsionin dhe Krimin e Organizuar pranoi kërkesën e prokurorit të posaçëm dhe dërgoi për gjykim në këtë gjykatë, procedimin penale ndaj të pandehurit Erion (alias Andrea) Alibej (alias Dylgjeri), i akuzuar për krimet: “Vrasja me paramendim” në dëm të viktimës Emiljano Ramazani më datë 20 korrik 2020 në lagjen “28 nëntori”, Elbasan; “Vrasja me paramendim” në dëm të Regis Runaj më datë 29 korrik 2020 në lagjen “Emin Matraxhiu” në Elbasan.
Të dy krimet, sipas gjykatës, të kryera në formën e veçantë të bashkëpunimit “Grup i strukturuar kriminal” përmes pjesëmarrjes në grup të strukturuar kriminal, bashkë me të akuzuarit më parë, Xhulian Hoxha e Euglen Halili.
Po ashtu, gjykata pranoi kërkesën e prokurorit për pushimin e çështjes ndaj personave nën hetim Albert Manahasa, 61 vjeç dhe Seit Manahasa, 38 vjeç, djali i Albertit për shkak se nuk e kanë kryer veprën penale “Vrasja me paramendim” në dëm të viktimës Emiljano Ramazani më 20 korrik 2020 dhe “mbajtje pa leje të armëve të zjarrit dhe municionit”, duke shuar me këtë rast dhe masën e sigurimit “detyrimi për t’u paraqitur në policinë gjyqësore”.
