Seanca e sotme e Kuvendit ka nisur me diskutime rreth zgjatjes së afateve të organeve të Vetingut.
Kreu i grupit parlamentar të PS-së Taulant Balla i kërkoi opozitës që përmbyllja e procesit të mos politizohet dhe zgjatja e afateve të organeve të drejtësisë të futet në rend dite në seancën e 10 shkurtit.
Balla theksoi se rregullorja e Kuvendit duhet respektuar dhe nuk mund të trajtohet si llastik.
Nga ana tjetër, kreu i grupit të PD Enkeled Alibeaj u shpreh se procesi është bërë në mënyrë të njëanshme nga mazhoranca pasi sipas tij ndërhyrjet në Kushtetutë duhet të harmonizohen mes dy palëve.
PJESË NGA KUVENDI
Alibeaj: I gjithë procesi i zhvilluar deri tani është i njëanshëm. I gjithë procesi për ndërhyrjen në Kushtetutë ka qenë i njëanshëm. Kushtetuta është akti, ku duhet të ndërhyhet sa më pak. Procedurat për të gjitha iniciativat parlamentare për ndërhyrjet në Kushtetutë duhet të jenë të harmonizuara. Kam dhe një kërkesë tjetër, që nuk ka lidhje me këtë çështje. Bëhet fjalë për një kërkesë tonën që është depozituar që në dhjetor, me veprimtarinë dhe ecurinë e komisionit hetimor për inceneratorët.
Balla: Ndryshimet në Komisionin në cështjet ligjore kanë një afat nga dy deri në 3 javë. Kjo hapësirë është e vetmja që ka lënë rregullorja. Nuk kemi asnjë hapësirë për të negociuar.
Unë do ftoja kolegët e PD që të kuptojmë rëndësinë e përmbylljes së procesit, nuk duhet politizuar. Ndryshimet kushtetuese kanë ardhur si nevojë e vazhdimit të procesit të vetting.
Dobia e procesit të vettingut duhet të tejkalojë axhendën politike të secilit prej nesh. Grupi i PS ka përqafuar propozimet e ardhura nga ekspertët e huaj, është nevoja që Shqipëria të çojë përpara këtë proces.
Kur flasim për procedurë ose do respektojmë rregulloren sic është, unë nuk e konsideroj rregulloren e Kuvendit llastik. Për ta mbyllur do sugjeroja që seanca të shprehet me votë, dhe data 10 shkurt të respektohet. Për mbledhjen e Këshillit të Legjislacionit ajo është automatike.
Sapo të jetë kryetarja e Kuvendit, natyrshëm ne nuk kundërshtojmë perspektivën e rregullores. Zgjatja e organeve të vettingut nuk duhet politizuar! Të hedhim në votim pjesën e parë se për të dytën kishim dakortësi.
