Partia Demokratike e përfaqësuar nga Basha ka sulmuar koalicionin “Shtëpia e Lirisë” të formuar mes Berishës, Kryemadhit dhe Nard Ndokës. Në një deklaratë, Pd e ka cilësuar si një rikthim në partinë e vjetër, Rama-Meta-Berisha.
Deputeti i PD-së, Ervin Salianji i ftuar në studion e RTV Ora u shpreh se nuk ka asnjë shans që demokratët të votojnë për një parti tjetër, ashtu si të zhgënjyerit kanë hyrë në një garë për të dëmtuar interesat e PD dhe për t’i dhënë oksigjen Edi Ramës, demokratët do dinë të zgjedhin PD.
Salianji: Demokratët shkojnë te sigla e tyre që është PD e Shqipërisë. Po ta shohim nga pikëpamja ligjore nuk ka një koalicion, sepse koalicionet ndërtohen mes partive politike, ndërkohë që “Foltorja” ose “Komisioni i Rithemelimit” sot për sot është një parti në tentativë. Është një inat që nuk dihet në çfarë do transformohet, por nuk është parti politike. Nuk jemi në kushtet e koalicionit.
Salianji tha se LSI ka të drejtë të garojë në zgjedhje si parti politike më vete.
Salianji: Interesi i PD është që të rritet Partia Demokratike, interesi i qytetarëve shqiptarë është që të fitojnë kandidatët e PD përballë Edi Ramës. Kandidatë e PD janë kandidatët me më shumë potencial. Nëse do të ishte nevoja sidomos në situata si këto ku janë zgjedhje të pjesshme ku nuk ka peshë të madhe për partitë politike, duhet të mos kandidonte asnjë parti tjetër nëse ishte në opozitë. Nëse janë opozitarë, por ndërkohë nxjerrin një kandidat, për t’i prishur pinë kandidatit të PD dhe i çojnë Edi Ramës ujë në mulli, apo tentojnë që të çajnë opozitën, ky nuk është opozitarizëm. Ata e kanë të gjithë mendjen a fitojnë apo jo me PD.
Deputeti u shpreh se gara e vetme e PD së përfaqësuar nga Basha është me Edi Ramën. Salianji madje u shpreh optimist që qytetarët shqiptarë do zgjedhin PD në këto zgjedhje.
Salianji: Çdo votë e shkuar dëm për shkak të një çarje që tentohet për ta kthyer këtë në një sfidë me njëri-tjetrin është gabim. Fokusi është te qeverisja lokale, te abuzimi që në Durrës ka qeverisur një “gon grata” dhe vazhdon influenca e tij. Në bashkitë e tjera PD ka mundësi të jashtëzakonshme për të fituar. Treçereku i bashkisë së Lushnjes sot është në burg bashkë me kryetarin e bashkisë. Janë situata oportune që opozita të fitojë. Shkodra gjithashtu do të fitohet nga PD.
Partia Demokratike, ka mbetur e fundit për përcaktimin e kandidatëve mes gjithë forcave politike që garojnë ne zgjedhjet e pjesshme të 6 marsit. Deri tani vetëm janë 4 bashki në të cilat degët kanë propozuar emra.
