Deputeti i PD, Flamur Noka është shprehur se në koalicionin “Shtëpia e Lirisë” nuk mund të futen më edhe parti të tjera pasi nuk e lejon ligji.
Në një intervistë për Ora News, Noka theksoi se Lulzim Bashën përveç demokratëve e kanë braktisur edhe aleatët opozitar.
Flamur Noka: Koalicionin Shtëpia e Lirisë është një koalicion i madh po për shkak të detyrimit ligjor, vetëm aq parti mund të përfshiheshin zyrtarisht. E kufizonte ligji. Ligji përcakton se numri i partive në një koalicion nuk duhet të jetë më i madh se numri i deputetëve që ka ai koalicion. Ajo që vlen të theksohet është se shoqatën e bravave nuk e mbështet asnjë aleat. Pasi e kanë braktisur demokratët e braktisën edhe aleatët. Aleanca e jonë ka një aleancë me demokratët dhe gjithë populli opozitar, jo vetëm në këto 6 bashki po në të gjithë territorin e Republikës së Shqipërisë.
Ai tha se primaret u zhvilluan për herë të parë në Shqipëri, dhe sipas tij nëpërmjet këtij procesi u vërtetua se sa e shenjtë është vota.
Flamur Noka: Askush nga demokratët nuk mbështet metodën e kandidimeve me zarfa. PD nëpërmjet Komisionit të Rithemelimit në të gjithë degët që do të ketë zgjedhje zhvilloi procesin e primareve, një proces që aplikohet për herë të parë. Vota është e shenjtë. Brenda forcave politike primaret e lartësojnë shumë shenjtërimin e votës dhe vlerën e saj.
Noka shtpi se do të futen në zgjrdhje me kandidatët fitues që janë produkt i votës së lirë, dhe jo produkt zarfesh.
