Partizani do të luajë nesër sfidën e javës së 18-të ndaj Laçit në transfertë. Takimi do të luhet në stadiumin e Laçit dhe do të nisë në orën 13:45, ndërsa të dyja ekipet do të kërkojnë të marrin me çdo kusht fitore. Sot në konferencën për shtyp ka folur edhe trajneri i Partizanit, Dritan Mehmeti që ka analizuar këtë takim, ndërsa ka folur për gjendjen e Stenio Junior, por edhe për merkaton.
Gjendja e skuadrës? “Gjendja e skuadrës ka qenë pjesërisht e mirë, duke pasur parasysh fillimin e ndeshjes ditën e enjte dhe intensiteti i ndeshjeve jep ngarkesën maksimale në aspektin psiko-fizik, megjithatë jemi të barabartë si kundërshtari. Dhe kundërshtari ka luajtur në mesjavë dhe do të shkojmë si të barabartë në ndeshjen me Laçin”.
Statistikat? “Lojtarët nuk merren me statistika, skuadra e Laçit të imponon respekt, megjithatë nuk shohim se çfarë është bërë më parë, ne shohim vetëm çfarë do të bëjmë ne në vazhdim dhe është shumë e rëndësishme që të bëjmë maksimumin dhe të bëjmë atë çka do të na dhurojë tapeti i fushës”.
Sfida ndaj Laçit? “Duke pasur parasysh që kanë mundur Teutën, Partizani do të fokusohet te ndeshja e radhës dhe nuk më intereson se çfarë ka bërë Partizani më përpara. Është shumë e rëndësishme që ne të rrisim cilësinë e lojës dhe të shkojmë drejt rezultatit”.
Stenio Junior? “Stenio Junior ka pasur probleme në sfidën ndaj Dinamos, me konsultimin me stafin mjekësor ne do të dalim në një përfundim sesi do të jetë gjendja e tij dhe koha e rikuperimit dhe shpresoj që të jetë në një të ardhme sa më të afërt për ndeshjet e radhës. Do ta shohim dhe sot është 50 me 50 për sa i përket ndeshjes me Laçin.”
Faza taktike? “Kur skuadra e mbyll shumë mirë zonën e kundërshtarit është faktor tjetër që ndihmon, është faktori psikologjik që duhet të jesh i ftohtë përpara portierit. Që po t’i shohim situatat që Partizani ka pasur ndaj Dinamos, Kastriotit edhe me lojtarë me eksperiencë që ka qenë edhe ajo dëshira e madhe për ta bërë sa më shpejt golin, kjo ndikon dhe duhet të jesh shumë i qetë dhe shumë më i ftohtë përballë portierit. Duhet të marrim masat duke pasur parasysh se çfarë skuadre ka Laçi, duhet të jemi cinik dhe sigurisht do të shkojmë për rezultat.”
I kënaqur nëse barazoni? “Do ta konsideroja barazimin në varësi sesi do të shkonte ndeshja. Partizani do të shkojë në Laç për fitore, pastaj nga interpretimi i lojës së skuadrës sonë do të sjellë në atë 90 minutëshe, mund të them që jam ose jo i kënaqur me barazim.”
Merkato? “Skuadra ka arritur marrëveshjen me mesfushorin kongolez, Masanga Matondo edhe lojtarin serb Milan Mirosavljev të cilët do të jenë pjesë e ekipit”, u shpreh Mehmeti.
