Tre persona raportohet se kanë mbetur të plagosur si pasojë e një aksidenti që ka ndodhur mëngjesin e sotëm në Berat.
Nga raportimet mësohet se aksidenti ka ndodhur në rrugën e fshatit Drobonik, ku një automjet ka dalë nga rruga. Për pasojë është plagosur drejtuesi i mjetit, i identifikuar si Renato Kola dhe dy prindërit e tij, që ndodheshin si pasagjerë.
Automjeti tip Fuoristradë Mitsubishi, me targa AA 531 CA, ku udhëtonte një familje, duke zbtitur nga fshati në drejtim të Beratit, ka rrëshkitur dhe ka rënë nga një lartësi rreth 20 metër.
Si pasojë, është plagosur lehtë drejtuesi i mjetit Renato Kola 25-vjeç, ndërkohë që të plagosur rëndë kanë mbetur dy prindërit e tij, që udhëtonin bashkë me djalin.
Të plagosurit janë transportuar drejt Spitalit Rajonal Berat, ku ndodhen nën kujdesin e mjekëve, me plagë të shumta në trup. Në vendngjarje kanë shkuar forca të shumta policie, të cilët kryejnë kqyrjen e vendit të aksidentit dhe po punojnë për zbardhjen e shkaqeve të tij.
Burimet policore në vendngjarje bëjnë me dije se, paraprakisht mendohet se shkak për këtë aksident të jetë bërë ngrica në rrugë, që ka sjellë edhe rrëshkitjen e mjetit, që-sipas policisë-ka qenë me shpejtësi dhe nuk ka mundur sot të kontrollojë rrëshkitjen. Zona në të cilën ka ndodhur aksidenti është një zonë malore dhe e rrethuar me kodra të shumta,ku dielli arrin të depërtojë vetëm pas mesditës.
