Nga Boldnews.al
Prokuroria e Posacme, Spak, ka marrë të pandehur anëtarin e Kolegjit të Posaçëm të Apelimit, Ardian Hajdari, një zhvillim i raportuar ekskluzivisht nga “Boldnews.al” dy ditë me parë.
Hajdari është kallëzuar penalisht rreth një vit më parë për “falsifikim dokumentash”, “fshehje të ardhurash” dhe “refuzim për deklarim të pasurisë”.
Kallëzimi është dorëzuar nga ish-magjistratët, Antoneta Sevdari, Ervin Metalla dhe Elsion Sadiku.
Së fundmi, SPAK ka konkluduar se Ardian Hajdari duhet të merret i pandehur.
“Boldnews.al” ka siguruar një foto, që tregon gjyqtarin e KPA, Ardian Hajdari, duke dalë nga ambjentet e SPAK pasditen e kësaj të Enjte (27 janar 2021).
Çfarë zbuloi “Boldnews.al”
Në një shkrim të publikuar më herët, “Boldnews.al” raportoi se SPAK kishte mbyllur hetimet për anëtarin e KPA, Ardian Hajdari.
Ky raportim u mohua nën zë nga zyrtarët e SPAK. Por, këtë të Enjte, informacioni u konfirmua prej zhvillimeve në Prokurorinë Speciale.
“Boldnews.al” raportoi më herët:
“Falsifikim dokumentash”, Ardian Hajdari i KPA merret nesër i pandehur nga SPAK
Anëtari i Kolegjit të Posaçëm të Apelimit (KPA), Ardian Hajdari, pritet të merret i pandehur për veprën penale të “Falsifikimit” të dokumentave, me të cilët ka aplikuar për një pozicion në institucionin e shkallës së dytë të Vetingut.
Burime nga Struktura e Posaçme Anti Korrupsion (SPAK) deklaruan për “Boldnews.al” se Hajdari është thirrur të paraqitet paraditen e së Mërkurës (dt. 26 janar 2021), për t’iu komunikuar zyrtarisht akuza e ngritur nga prokurorja e çështjes.
Hajdari është kallëzuar penalisht në qershor 2020 nga ish-magjistratët Antoneta Sevdari, Elsion Sadiku dhe Ervin Metalla.
Në të njëjtin kallëzim ishte edhe emri i ish-anëtarit tjetër të KPA-së, Luan Daci, i cili tashmë është shkarkuar nga detyra, pasi u dënua me vendim të formës së prerë për të njëjtën akuzë, “falsifikim dokumentash”.
Në kallëzimin e tyre, tre ish-magjistratët akuzonin Ardian Hajdarin se kishte falsifikuar dokumentat e aplikimit për në Kolegjin e Posaçëm të Apelimit, pasi ai nuk plotësonte kriterin e kërkuar për ushtrimin e funksioneve prej të paktën 15 vjet si jurist.
Hajdari ka dorëzuar formularët e aplikimit pranë Avokatit të Popullit në shkurt të vitit 2017.
SPAK ka shtyrë gjatë në kohë hetimet ndaj tij, deri në prag të afateve të parashkrimit të hetimeve, të cilat përfundojnë në shkurt të këtij viti.
Në rast se SPAK-u konfirmon zyrtarisht akuzat ndaj Ardian Hajdarit, siç është mësuar nga “Boldneës.al”, atëherë ai do të pezullohet menjëherë nga detyra, me një vendim specifik të kolegëve të tij të Kolegjit të Posaçëm të Apelimit.
Ardian Hajdari ishte relator i procesit për masë disiplinore ndaj kolegut të tij, Luan Daci.
Me vendim tëtij, KPA shtyu përkohësisht shkarkimin e Dacit, edhe kur ai u dënua me një vit burgim, të konvertuar në shërbim prove, me vendim të formës së prerë nga Gjykata e Apelit e Krimit të Organizuar dhe Korrupsionit.
Tashmë, vetë Hajdari pritet të jetë në të njëjtën tavolinë përballë prokurorëve të SPAK-ut, në të njëjtën situatë që u gjend më herët Luan Daci.
Rasti i mëparshëm i Dacit dhe tashmë ky i fundit me Ardian Hajdarin dëshmojnë se procesi i rekrutimit të “gjyqtarëve të gjyqtarëve” ka ceduar mjaft rëndë.
Anëtarët e trupave të rivlerësimit u përzgjodhën pas një procesi të gjatë, i cili përfshiu një seri institucionesh, përfshirë edhe trupën e Operacionit Ndërkombëtar të Monitorimit.
Pavarësisht filtrave të shumëfishtë, rastet e Dacit dhe Hajdarit tregojnë dështimin në seri të strukturave përzgjedhëse dhe monitoruese.
