Kryeministri Edi Rama i shtyu deputetët e PS-së që të mendojnë për kandidatura të mundshme për postin e Presidentit të Republikës, pas përfundimit të mandatit të Ilir Metës në prill të këtij viti.
Rama tha se kandidatura mund të jetë një burrë, ose grua, edhe nga jashtë territorit të Republikës së Shqipërisë, por pranoi se me krizën në PD, socialistët e kanë të vështirë të dialogojnë për këtë çështje.
“Presidentin duhet ta zgjedhë ky grup parlamentar në radhë të parë. Ndërlikimi me krijimin e dy Partive Demokratike na e bën të vështirë të gjejmë adresën se ku ta kërkojmë dialogun me opozitën parlamentare, por ndërkohë duhet të mendojmë për mënyrën sesi mund të këshillohemi me qytetarët edhe për këtë vendimmarrje”, tha Rama, në mbledhjen e grupit parlamentar të PS-së.
“Në një mënyrë a një tjetër duhet të gjejmë mënyrën për të gjetur një emër për figurën e presidentit apo presidentes së re të Republikës. Kemi përgjegjësinë e madhe qytetare, politike dhe kushtetuese që t’i japim shqiptarëve në krye të shtetit një njeri normal, në radhë të parë. Presidenti mund të gjendet këtu mes nesh, por mund të jetë edhe jashtë territorit të Republikës së Shqipërisë. Do iu lutesha të gjithëve të mendojmë në këtë sens dhe cilido që ka një ide sesi mund të organizohemi”, u shprej.
Zgjedhjet
“Një objektiv i ri është shfaqur para nesh. Zgjedhjet e pjesshme lokale në 6 bashki. Pas shkeljeve të kushtetutës nga ana e zotërisë, dekretoi datën e zgjedhjeve. Ne do ta përmbushim me seriozitet detyrën tonë, që në 6 këto njësi të zgjidhen kandidatët e PS-së. Për fushatën, do të organizohemi sa më mirë, mbi të gjitha duke mos e humbur fokusin nga këshillimi kombëtar”. Kështu u shpreh, kryeministri Rama në mbledhjen e grupit parlamentar të PS-së, këtë të hënë, ndërsa u kërkoi deputetëve që të bëjnë sa më pak politikë në këto zgjedhje.
Ai tha se kundërshtarët e PS-së në këtë zgjedhje do të luftojnë për mbijetesën e tyre politike në kurriz të qytetarëve.
“Forcat e angazhuara në këto 6 njësi do të jenë kryesisht forcat vendore. Mesazhet tona duhet të jenë thuajse tërësisht të lidhura me hallet dhe problemet e komuniteteve vendore të këtyre bashkive. Ndërkohë, sa më pak politikë në këto zgjedhje aq më mirë. Politikisht panorama e këtyre zgjedhjeve është e qartë, nga njëra anë ne me punë dhe nga ana tjetër kundërshtarët tonë, në 6 shtete me 12 përsheshe, 18 e mundshme edhe më shumë mbase. Nga njëra anë ne me 6 kandidatë, me 12 ose 18 kandidatë që do të luftojnë me mbijetesën politike. Nga njëra anë ne, këta që jemi, me të mirat dhe të metat tona, për të punuar për këto qytete, nga ana tjetër ata me brava, varre, trastat me dekorata, të gjithë kundër të gjithëve, për të provuar forcat mes tyre, në kurriz të atyre bashkive”, tha Rama.
