Të tjera detaje raportohen mbi vrasjen e Bledar Muçës, ngjarje e ndodhur në Aartselaar, AntWerp, në Belgjikë.
Mediat vendase raportojnë se viktima është qëlluar me disa plumba, njëri prej të cilëve e ka goditur në kokë.
Dyshimet janë se autorët e kanë ndjekur viktimën prej kohësh, duke pasur informacione të qartambi lëvizjet e tij.
Bledar Muça, 39 vjeç, u ekzekutua të shtunën pak pas orës 23:00 në Baron Van Ertbornstraat. Viktima është qëlluar me armë zjarri në një rrugicë në dalje të autostradës dhe si pasojë e plagëve nga plumbat ka ndërruar jetë në vend.
Bledar Muça kishte shtetësi britanike dhe për autoritetet vendase ka qenë e vështirë fillimisht identifikimi si shqiptar i tij. Pas hetimeve, Bledar Muçës i është gjetur edhe një pasaportë tjetër bullgare me identitet tjetër. Është dashur identifikimi me gjurmë gishtërinjsh për të zbuluar se viktima është Bledar Muça 39-vjeç nga Elbasani.
Mësohet se në këtë atentat kanë marrë pjesë të paktën dy persona, të cilët pas krimit u larguan me një makinë. Deri më tani nuk ka asnjë gjurmë të autorëve.
Bledar Muça është emër i njohur për drejtësinë shqiptare dhe rezulton i përfshirë në shumë ngjarje kriminale në qytetin e Elbasanit. Në këtë qytet ai njihet për lidhjet e ngushta me fisin Çapja, ndërsa konsiderohej si “krahu i djathtë” i Ardjan dhe Florenc Çapjas.
Në verën e vitit 2016 ai u arrestua dhe u dënua me dy vite burg pasi qëlloi me armë ndaj efektivëve të policisë teksa ishin në vëzhgim të familjes Çapja. Muça u filmua nga kamerat e sigurisë me armë në dorë duke qëlluar ndaj policisë.
