FSHF ka reaguar pas rënies së serverit së faqes zyrtare të organit qeverisës së futbollit në vendin tonë.
Nuk dihen ende shkaqet zyrtare të mosfunksionit të faqes, por një gjë e tillë ndodh pas akuzave të kryebashkiakut, Erion Veliaj në drejtim të FSHF-së dhe kreut të saj, Armando Duka.
Federata ka reaguar nëpërmjet një njoftimi në rrjetin social “facebook” ku akuzon kryetarin e Bashkisë së Tiranës për këtë akt.
Reagimi i FSHF:
Në një ngjarje të paprecedentë uebi i qeverisë së futbollit është sulmuar në mënyrë agresive nga hakerat dhe mbyllur sot pas publikimit të fakteve tronditëse për ndërhyrjen flagrante të kryetarit të Bashkisë së Tiranës, Erion Veliaj në zgjedhjet e Shoqatës Rajonale të Futbollit Tiranë.
Në çastet që po flasim faqja vazhdon të jetë e mbyllur për shkak të këtij sulmi të qartë me prapavijë politike.
FSHF dënon këtë sulm skandaloz të politikës dhe i bën thirrje që të tërhiqen sa më parë pasi kjo taktikë mund të ketë pasoja të rënda për cilindo të përfshirë në këtë akt të turpshëm. Pavarësisht këtij sulmi, komuniteti i futbollit shqiptar do të vazhdojë të denoncojë të gjitha ndërhyrjet, sulmet dhe presionet e politikës dhe nuk do të tërhiqet përballë shantazheve dhe kërcënimeve të pushtetit.
