Inspektori i Lartë i Drejtësisë kërkon nga Këshilli i Lartë i Prokurorisë shkarkimin nga detyra të prokurores së Dibrës Belina Zeneli.
Sipas ILD, prokurorja ka kryer shkelje shumë të rëndë disiplinore, që diskrediton pozitën dhe figurën e prokurorit gjatë ushtrimit të detyrës
Kërkesa për inspektim nga Olsian Çela
Në Maj të vitit të kaluar, Prokurori i Përgjithshëm Olsian Çela kërkoi nga ILD të inspektojë shkeljet e prokuroreve të Dibrës, Belina Zeneli dhe Xhoana Mehmetaj, për zvarritje të hetimeve dhe të drejtuesit të tyre Rifat Kojku për mos ushtrim të kompetencave për të kontrolluar veprimtarinë e vartëseve.
Këtë të Enjte, ILD bën me dije se nga hetimi disiplinor, për prokurorët Rifat Kojku dhe Xhoana Mehmetaj “provat ishin të pamjaftueshme për të provuar kryerjen e shkeljes disiplinore”.
Shkeljet
Ndërsa hetimi ka vijuar për prokuroren Belina Zeneli.
Sipas ILD, nga hetimi disiplinor i kryer, në analizë të punës së kësaj magjistrateje në periudhën 2013-2021, provohet se:
- Nga ana e prokurores Belina Zeneli janë ndërmarrë veprime dhe mosveprime, që përbëjnë mospërmbushje të pajustifikuar dhe të përsëritur të funksioneve gjatë hetimit, duke sjellë zvarritje të pajustifikuara të akteve procedurale, të cilat janë të detyrueshme për zbatim nga ana e magjistratëve.
- Si pasojë e veprimeve e mosveprimeve të magjistrates, nuk i janë dhënë zgjidhje ligjore 33 procedimeve penale, si dhe nuk është kryer asnjë veprim verifikimi në lidhje me 300 kallëzime.
- Magjistratja ka zvarritur hetimet paraprake duke mos i kryer veprimet hetimore në kohë dhe në dinamikë për periudha të gjata kohore të gjata, tej afateve procedurale dhe pa pasur arsye ligjore.
- Magjistratja ka kryer të njëjtën shkelje, gjatë periudhës kohore 2013 – 2021, duke bërë që shkelja të jetë vazhduese.
- Shkeljet proceduriale të kryera nga magjistratja, provohen të jenë kryer me dashje direkte. Kjo bazuar në formimin dhe eksperiencën e gjatë si prokurore, si dhe për faktin se për këto lloj shkeljesh, ndaj saj në vitin 2014 është dhënë masa disiplinore “Vërejtje me paralajmërim për shkarkim nga detyra”.
- Veprimet e magjistrates Belina Zeneli kanë sjellë pasoja në dhënien e drejtësisë dhe kanë cënuar imazhin e organit të akuzës duke ulur besimin e publikut tek drejtësia.
ILD konkludon se “veprimet dhe mosveprimet e magjistrates Belina Zeneli përbëjnë shkelje shumë të rëndë disiplinore, që diskrediton pozitën dhe figurën e prokurorit gjatë ushtrimit të detyrës dhe Inspektori i Lartë i Drejtësisë i propozon Këshillit të Lartë të Prokurorisë masën disiplinore ‘Shkarkim nga detyra’, parashikuar nga neni 105, pika 1, shkronja ‘dh’ dhe neni 111, pika 2 të ligjit nr. 96/2016 ‘Për statusin e gjyqtarëve dhe të prokurorëve në Republikën e Shqipërisë’, i ndryshuar, si dhe neni 148/d, pika 2, shkronja ‘a’ e Kushtetutës së Republikës së Shqipërisë”.
