Banorët e Laprakës kanë bllokuar sërish rrugën “Josif Pashko” në kundërshtim ndaj shembjes së banesave të tyre për t’i hapur rrugë projektit të “Unazës së Madhe”. Njëri prej protestuesve deklaroi për “Faxnews” se banorët e kësaj zone solidarizohen me ata të lagjes “5 maj”, ku nesër do të nis shembja e shtëpive të tyre nga Inspektoriati Kombëtar i Mbrojtjes së Territorit. Në vijim, qytetari tha se është programuar takim mes banorëve të Laprakës dhe Presidentit të Republikës Ilir Meta për të kërkuar ndihmë dhe këshillë prej tij.
“Kanë shkuar te 5 maji që nesër të jenë pa energji dhe pa ujë , që të nisin shembjet. Edhe ata janë në tension e sipër. Më thanë se janë në banesa, shpresoj të eci gjithçka mirë. Nuk respektohet e drejta e pronës në Shqipëri Nesër do të mundohem të shkoj.
Kauza jonë dhe e 5 majit është një. Në orët e pasdites është e vështirë të mblidhen njerëz në protestë. Siç do na mbështesin sot, do t’i mbështesim dhe ne nesër banorët e 5 majit. Janë banorët e Paskuqanit. Sot e ka radhën 5 maji, nesër të tjerët. Ka devijuar ky projekt.
Uniformat blu janë të njoftuar. E kam bërën joftimin në komisariatin nr.3 . Te ky lokal afër ka plot civilë, s’dalin, bëjnë foto dhe dalin. Policë me uniformë dhe patrullë nuk ka. Ka pasur raste një furgon të futet mes për mes turmës. Në Shqipëri mund të quhet shofer I çmendur, në botë e quajnë atentat. Të vijnë, të vendosin perimetrin e sigurisë. E kuptoj irritimin e shoferëve, kauza jonë është më e madhe se kafja e tyre.
Ka një javë kohë që institucionet të na përgjigjen, kemi programuar takim me presidentin e Republikës. U kemi dërguar letër ARRSH, bashkisë. Shpresojmë të na japë ndonjë ndihmë, konsultë nga presidenti”, u shpreh banori i Laprakës.
Prej muajsh me radhë, banorë të zonës së Laprakës në kryeqytet protestojnë kundër shembjes së 700 banesave të tyre, shkatërrimi i të cilave do të krijojë hapësirë për zbatimin e projektit të “Unazës së Madhe”. Ata kanë kërkuar biseime me bashkinë e Tiranës, qeverinë dhe institucionet e tjera pasi duan të kompensohen sipas çmimit të tregut. Banorët e Laprakës pretendojnë se qeveria dhe bashkia e Tiranës kanë devijuar projektin origjinal. Mosdhënia e informacioneve prej autoriteteve shtetërore ka ngjallur pakënaqësi tek ta duke e konsideruar këtë projekt si aferë korruptive. Banorët kërkojnë që të hetohet Drejtori i Agjencisë Kombëtare të Kadastrës Artan Lame. Gjithashtu, ata kanë paralajmëruar se do t’i përshkallëzojnë protestat në rast nuk jepet zgjidhje.
