Sali Berisha dhe Lulzim Basha zhvilluan sot takimet e tyre të para për vitin 2022, në një kohë kur përplasjet jo vetëm mes tyre, por edhe mbështetësve kanë arritur pikën kulmore.
Berisha kishte zgjedhur Shkodrën, ndërsa takimi u mbajt në Pallatin e Sportit të qytetit. Në anën tjetër, Basha ishte në Fier, ku takimi u mbajt në sallën e Teatrit Bylis.
Ish-Kryeministri u prit nga entuziazmi i disa qindra demokratëve me thirrjet “O Sali o hero, gjithë Shqipëria ty të do” apo “Rama ik, Basha ik”.
Në anën tjetër Basha u prit me protesta nga një grup prej dhjetra demokratësh, që me pankartat e tyre, i kujtonin Bashës se ishte shkarkuar si Kryetar i PD apo se ishte “non grata” në Fier.
Berisha u rrethua nga demokratët që e takonin dhe përfaqësonin, ndërsa Basha në anën tjetër me masa të theksuara sigurie u mbrojt nga truprojat nga momenti që doli nga automjeti, duke hapur edhe një çadër, pak a shumë një skemë që përdoret zakonisht për mbrojtjen e Kryeministrit Edi Rama, ku përballet me protestues.
Për takimin e Bashës ka denoncime se në sallë ndodheshin edhe socialistë apo të punësuar në Bashkitë e Qarkut të Fierit, gjë që për takimin e Berishës në Shkodër nuk ka pasur aludime, ndërsa edhe mesazhet që kanë përcjellë kanë pasur target krejt të ndryshëm.
Të dy takimet u zhvilluan në të njëjtën orë dhe organizatorët kishin menduar që fillimisht fjalën ta merrnin të pranishmit.
Basha kishte zgjedhur një grup prej 5 ose 6 qytetarësh, një pjesë e të cilëve pohuan se i përkisnin shoqërisë civile, ndërsa Berisha kishte zgjedhur anëtarët dhe simpatizantët e PD, duke bërë një gërshetim brezash.
Si Basha ashtu edhe Berisha morën fjalën në të njëjtën kohë dhe që të dy pothuajse e mbyllën atë në të njëjtën orë, si në një garë audience.
Berisha e përqëndroi fjalimin e tij në situatën në të cilën ndodhet vendi, duke vënë theksin në rrezikun e pluralizmit pas asaj që e konsideroi si kapjen nga fyti të Lulzim Bashës nga Kryeministri Edi Rama.
Ndërsa Basha zgjodhi të flasë për nismat e PD, me mesazhe që më shumë i drejtoheshin atij që mund të konsiderohet si “elektorati gri” se sa anëtarëve të partisë që pretendon se drejton.
Berisha akuzoi Bashën si të kapur dhe peng të Ramës për shkak të korrupsionit dhe dosjeve, ndërsa Basha në anën tjetër tha se i kishte bërë thirrje Berishës ti thërriste mendjes, ndërsa u shpreh për ndarjen nga e shkuara.
