Është mbyllur në barazim pa gola klasikja e futbollit shqiptar mes Tiranës dhe Vllaznisë.
Një supersfidë që nuk zhgënjeu edhe sonte në aspektin e lojës ku në fushë pati spektakël, raste, tension dhe polemika por nuk munguan as incidentet që e prishën disi mbrëmjen e kësaj sfide.
Duhet thënë se ekipi i Brdariç dominoi ndeshjen dhe shpërdoroi shumë raste dhe nuk do ta ekzagjeronim nëse do të thonim që ndeshja mund të përfundonte edhe 0-3.
Vetëm në 20 minutat e para të ndeshjes Vllaznia kishte 3 raste të pastra me Aralicën dhe Latifin të cilët shpërdoruan për të shënuar.
Edhe pak para fundit të pjesës së parë, Aralica ishte vetëm me portierin e Tiranës dhe nuk arriti të shënonte.
Gjithsesi në pushim të pjesëve pati incidente që prishën disi mbrëmjen por sërish loja e bukur e ngrohu situatën në “Air Albania”.
Ishte e njëjta panorama edhe në pjesën e dytë ku lojtarët e Vllaznisë krijojnë dhe shpërdorojnë pa fund dhe vetëm Tirana mund ta konsiderojë të kënaqur veten me një pikë pas 90 minutave.
Mbyllet pa gola të shënuar por me një mori rastesh të humbura, një problem vërtetë i madh për Vllazninë që duhet të korrigjohet nëse dëshiron të fitojë titullin.
