Ish-Kryeministri Sali Berisha për rreth 2 orë dëshmoi para prokurorëve të Prokurorisë së Tiranës lidhur me protestën e 8 janarit.
Berisha u shpreh se Lulzim Basha, i cili është shkarkuar nga çdo funksion nga Kuvendi Kombëtar dhe referendumi i anëtarësisë, është simboli i lidhjeve me krimin.
Berisha tha se Lulzim Brava është simboli i politikanit që nuk njeh asnjë princip, që për të ruajtur karrigen, shndërroi selinë e PD në një seli që nuk ekziston askund tjetër, dhe ai ia dorëzoi Edi Ramës.
Ish-Kryeministri tha se do të dorëzohet çdo informacion që zotërohet lidhur me Lulzim Bashën dhe banditët që pushtuan selinë e PD-së.
“Si ka mundësi që të njëjtat armë që përdori Policia e Edi Ramës, përdori banda e Lulzim Bravës? Kjo ishte një tjetër dëshmi e lidhjeve të mercenarëve të Lulzim Bravës me narko-policinë e Edi Ramës. Lulzim Brava nxori nga selia PD armët me mjetin e tij, por ka dëshmi flagrante të pranisë së njerëzve të armatosur në seli”, tha Berisha.
Sipas tij, nuk ka asnjë që ve në dyshim ekzistencën e këtij grupi banditësh, të përbërë nga fondamentalistë, vrasës dhe pengmarrësit, që shërbenin si roje të Lulzim Bashës.
“Lulzim Brava, në kundërshtim me ligjet e vendit mbrohet nga Garda. Oficerët e Gardës nuk mund të qëndronin kurrë në mbrojtje të një njeriu që mban afër banditë të armatosur”, tha Berisha.
Ai tha se është absurde të mendosh se si një oficer Garde, që ka detyrë të ruajë dikë, të qëndrojë në të njëjtin vend me banditë e kriminelë.
“Persona që kanë qenë në mbrojtje të Lulzim Bashës, kanë qenë pjesë e organizatave terroriste, kanë qenë në Siri dhe janë kthyer”, tha Berisha, duke shtuar se “ata janë mercenarë, që mbronin Lulzim Bravën”.
Berisha tha se askush nuk më kundërshton dot për praninë e bandës në seli, për frëngjitë e lëna nga ku u lëshuan gazi, pluhuri toknik, bombat shurdhuese.
“Një njeri idealist me flamurin e PD që tentoi të vendoste në ballkon, u sulmua nga një grup primitiv, që i çanë kokën”, tha Berisha, duke ripërsëritur se në seli ka pasur njerëz të armatosur.
Ai shtoi se ka pasur fotografi të personave të tillë në seli, janë publikuar disa orë para protestës. Berisha tha se u gjakosën 12 protestues paqësorë, u helmuan me gaz me dhjetra e qindra të tjerë, ndërsa nga pala tjetër apo policia, nuk u gërvisht asnjë person.
