“Një veprim prej skuthash”, e ka cilësuar deputeti Tritan Shehu, vendimin e Lulzim Bashës dhe mbështetësve të tij, për përjashtimin nga partia, të disa prej anëtarëve të Komisionit të Rithemelimit, dhe pezullimin e anëtarëve të tjerë.
Shehu në një reagim të tij shprehet se vendimi është nul, sa kohë që Kuvendi i 11 Dhjetorit e ka shkarkuar kryesinë e Lulzim Bashës, dhe momentalisht partia drejtohet nga Komisioni i Rithemelimit.
Shehu tha se e gjitha kjo është qesharake, pasi një vendim i tillë është tërësisht nul.
Sipas Shehut, Komisioni i Rithemelimit do të vijojë të bëjë të gjitha detyrat, deri në zgjedhjet e përgjithshme që do të organizohen për të gjitha strukturat drejtuese, përfshirë edhe kryetarin në datën 22 Mars.
“Nga kush kryesi të lutem? Sepse PD nuk ka as kryetar, as kryesi dhe as struktura të tjera. Çdo gjë tjetër është jashtë realitetit, është në vendim nul. Një grup njerëzish mund të mblidhet kur të dojë, dhe nëse vazhdojnë gjithë natës mund të kenë dhe çrregullime psikologjike, nuk ekzistojnë të tilla gjëra. Çdo njeri mund të thojë që unë marr x vendim, por është një qenie jashtë realitetit.
Grupi i rithemelimit do të vazhdojë të gjitha detyrat që iu la nga Kuvendi, deri në 22 Mars, kur pritet që të jenë dhe zgjedhjet e brendshme. Kuvendi i datës 11 Dhjetor është i vetmi Kuvend i ligjshëm, të gjitha të tjerat janë veprime në kundërshtim me realitetin.
Nuk merrem fare me persona që mblidhen si skutha gjatë natës, pranova të prononcohem, se është e çuditshme e gjitha kjo që ka ndodhur.
Unë nuk jam përjashtuar as përkohësisht dhe as përgjithësisht, unë jam absolutisht një nga anëtarët e Komisionit të Rithemelimit të PD-së, unë nuk merrem me komedi, që tingëllojnë si groteske.
I shoh me përbuzje këto veprime, që kanë vetëm një qëllim, që të shkatërrojnë opozitën shqiptare. Edhe djegia e mandateve është bërë qëllimisht, për ti lënë fushë të lirë Edi Ramës që të bëjë se çfarë të dojë me Kushtetutën”, tha Shehu në një intervistë për Faxnews.
Vendimi i orës 03:00/ Basha përjashton Berishën dhe mbështetësit e tij nga PD
