Dështimi në pjesën e parë të sezonit dhe largimi i Ilir Dajës natyrshëm do të pasohej me ndryshime te Partizani. Të kuqtë duket se janë pajtuar me prishjen e misionit për fitimin e titullit dhe kanë nisur të largojnë lojtarë, të cilët përveçse nuk kanë dhënë shumë në fushë, janë një “barrë” financiare për klubin.
I pari ishte Filipoviç, teksa tashmë po mundohen të largojnë Kaçen. Ditën e djeshme u mësua se Mustës gjithashtu i është treguar dera.
Këto largime, bashkë me afrimet e Fernandinjos, Skukës e Kallakurit, sigurisht e ndryshojnë Partizanin. Do të ketë emra të rinj në të tria repartet. Në mbrojtje vjen Fernandinjo në vend të Mustës, teksa pritet edhe përgjigjja finale e Eneo Bitrit.
Në mesfushë ka ardhur Kallaku dhe automatikisht Kaçe del jashtë planeve, me klubin që po tenton ta divorcojë.
Në sulm ka ardhur Skuka, i cili pritet të vendoset menjëherë në majën e ofensivës, i shoqëruar me një mes Carës ose Malës dhe Zhuniorit. Sa për portën, Mehmeti pritet t’i besojë kapitenit Hoxha para Teqjes./Panoramasport
