Policia e Shtetit ka shoqëruar të paktën 60 demokratë, të cilët iu bashkuan protestës së djeshme të thirrur nga Komisioni i Rithemelimit, para selisë së PD.
Sipas raportimeve, mësohet se të ndaluarit po mbahen në komisariate, ndërsa të tjerë persona janë marrë në pyetje lidhur me ato që i konsiderojnë si akte dhune ndaj selisë së PD.
Interesant është fakti se policia nuk ka ndaluar asnjë prej personave që ndodheshin brenda godinës, prej së cilës u hodh gaz dhe lëndë të tjera kimike ndaj protestuesve, të cilët tentuan të hapin forcërisht dyert e blinduara të godinës.
Policia ndërhyri ndaj protestuesve me gaz lotsjellës dhe ujë me presion, pak sekonda pasi atyre iu kërkua ndihmë nga Lulzim Basha dhe mbështetës të tij, që ndodheshin në selinë e PD.
Policia ndërhyri dhunshëm ndaj protestuesve në disa drejtime, ndërsa më pas selia e PD u kthye në një “skenë krimi” ku nga grupi hetimor për më shumë se 4 orë u mblodhën dëshmi dhe prova, si dhe u sekuestruan serverat që ndodheshin brenda godinës së PD.