Një ndeshje për t’u mbajtur mend është ajo mes Romës dhe Juventusit në “Olimpico”. Pas një ndeshje me plot emocione dhe kartona, tensione e gola, në fund janë bardhezinjtë që dalin fitues me një rezultat 4-3.
Një përmbysje e çmendur e Juventusit që konfirmon karakterin e “Zonjës së Vjetër” e cila tashmë mund të thuhet se është plotësisht në garë për një vend në Champions.
Ndeshja nisi mjaft mirë për vendasit që shënuan me Abraham në 11’ teksa Dybala barazoi në 18’për ta mbyllur pjesën e parë 1-1.
Fraksioni i dytë i duelit është spektakolar, teksa Roma arrin të shënoje dy herë, me Mkhitaryan në 48’ dhe Pellegrinin një perlë në 53’.
Kur mendonin se ndeshja ishte mbyllur, Juventusi bashkë me zëvendësimet e bëra bën diçka të çmendur ku në 70’ me Locatellin shkurton diferencën dhe dy minuta më pas me Kulusevskin barazoi sfidën.
Çmenduri e vërtetë por ende nuk ka mbaruar pasi për gabimet e Romës, Juventusi në 77’ gjen edhe golin e avantazhit me De Sciglion dhe sërish ka suspancë.
Në 83’ Roma fiton penallti dhe ka mundësinë për të barazuar por Pellegrini gabon në mënyrë të pabesueshme duke i dhënë kështu fitoren Juves me rezultatin 4-3.
