Lulzim Basha po mbledh mbështetësit e tij në seli në prag të protestës së thirrur nga Komisioni i Rithemelimit dhe ish-Kryeministri Sali Berisha, të cilët kanë deklaruar se sot selia e Partisë Demokratike do të çbunkerizohet dhe do të kthehet në shtëpinë e lirisë.
Situata që po ndodh në partinë më të madhe opozitare në vend në jo pak raste merr nota humori, por edhe keqardhjeje.
Pamjet e mëposhtme tregojnë mënyrën se si mbështetës të Bashës hyjnë në seli, një nga një, nga dera anësore, edhe kjo e blinduar, ndërsa për disa sekonda presin sa dikush nga brenda ta hapë atë.
Pamje janë të ngjashe me ato të filmave të realizmit socialist, ku shfaqen ilegalët që shkojnë një nga një në bazat e PKSH-së. E njëjta gjë ndodh edhe sot në selinë e demokratëve, ku një nga një, deputetë dhe mbështetës të Lulzim Bashës, hyjnë në seli, pothuajse si ilegalët që shfaqeshin në filma.
