Kanë nisur tensionet para selisë së Partisë Demokratike.
Pak para orës 11:00, teksa Roland Bejko, anëtar i Këshillit Kombëtar në PD dhe mbështetës i Lulzim Bashës, po tentonte që të hynte në seli, por dera nuk iu hap.
Mes tij dhe mbështetësve të Berishës ka pasur dhe konfrontime fizike dhe fyerje.
Bejko nuk arriti të futej në seli dhe u largua prej aty, duke deklaruar se nuk do të shkojë më në seli, ku tha se “ndodhet një turmë njerëzish irracionale”.
Në një moment, ai i tregoi gishtin e mesit protestuesve.
Për mediat, Bejko tha: “Kjo që ndodh më ka ndodhur në shkurt 1991. Ishim duke organizuar grevën kundër diktatorit në Gjirokastër. Kam qenë drejtuesi i grevës dhe duke e zhvilluar, ka ardhur turma e enveristëve dhe na ka shkelur me këmbë”.
“Ishte dikush që më qëlloi nga pas, e kam mbajtur me bukë, sa herë vinte në Gjirokastër i shtroja tryezën. Kjo ka marrë fund. Si mundet partia jonë të arrijë deri këtu”, shtoi ai, duke bërë me faj për ndarjen mes demokratëve ish-kryeministrin Sali Berisha.
