Fëmija që humbi jetën në një kopësht privat në Fier këtë të Premte, dyshohet të jetë mbytur aksidentalisht.
Burime pranë grupit hetimor thanë se ka dyshime që fëmija i cili ka qenë i veshur me xhup, teksa ka dashur të marrë çantën, te varësja e rrobave i ka ngecur kapuçi i xhupit dhe është mbytur.
Ky është versioni paraprak se si mund të ketë humbur jetën fëmija, megjithatë hetimet vijojnë.
Daja i 3-vjeçarit, në një deklaratë për mediat, u shpreh se nga mjeku i spitalit ku fëmija ishte transportuar, familjarëve u është thënë se ishin vërejtur shenja në pjesën e fytit.
“E kemi çuar në mëngjes djalin në kopsht, për të edukuar… më morën në telefon e më thanë hajde se djalin e keni keq, aty takuam doktorin, që ishte munduar të kthente djalin në jetë, ai më shpjegoi, më tha djali ka ardhur aty i pajetë, ne i bëmë të gjitha këto dhe djalin nuk e shpëtuam dot, më thanë që kishte një shenjë në grykë, për këtë duam drejtësi”, tha daja.
Në informacionin paraprak lidhur me ngjarjen, policia njoftoi se “në orën 13:00, në një kopësht privat në qytetin e Fierit, ka ndërruar jetë një fëmijë 3 vjeç. Grupi hetimor po punon për zbardhjen e shkaqeve të vdekjes së fëmijës”.
