Policia dhe prokuroria vijojnë hetimet lidhur me atentatin e dy ditëve më parë në zonën e Don Boskos në Tiranë, ku një person mbeti i vrarë dhe 4 të tjerë u plagosën.
Nga hetimet e deritanishme dyshohet se objektiv i atentatit ishte shtetasi Edmond Crroj, i cili mbeti i plagosur, ndërsa viktimë mbeti Erion Çela, nipi i Crrojt.
Nga raportimet mësohet se policia ka kryer kontrolle në banesën e Edmond Crroj, por edhe të viktimës Erion Çelës që ndodhet në Maminas, si dhe të paktën në dy biznese të tij shumë pranë vendit të ngjarjes, një tabakino dhe një qendër estetike.
Por nga kontrollet raportohet se nuk është gjetur asgjë që mund të ndihmojë hetimet për zbardhjen e ngjarjes, apo të hedhë dritë mbi të.
Policia po heton rreth aktivitetit me të cilin është marrë Edmond Crroj kohët e fundit, duke qenë se më herët është proceduar në dy shtete të Bashkimit Europian, dhe njëra nga akuzat ka qenë ajo e përfshirjes në trafikun e drogës.
Hetuesit kanë dyshime se atentati ka ndodhur pikërisht nga ndonjë konflikt i pazgjidhur i Crrojt.
Kamerat e sigurisë janë sekuestruar në zonën ku ka ndodhur ngjarja, por edhe në segemente të tjera lidhëse ku po verifikohen pamjet e lëvizjes së autorëve të atentatit, që la një viktimë, Erion Çelën, të plagosur vëllain Blerim Çelën, dajën Edmond Crrojn, 19 vjeçarin Azbi Selimaj dhe Arben Danin.
Dyshimet janë se autorët janë larguar në drejtim të Fushë-Krujës por deri më tani nuk ka asnjë të dhënë për lokalizimin e tyre e as ndonjë njoftim për djegien e mjetit që ata përdorën gjatë atentatit.
