Betty White ka sekretin e saj për një jetë të gjatë dhe të plotë dhe kjo nuk është ajo që zakonisht dëgjojmë nga yjet e Hollivudit. Aktorja ka treguar në një intervistë të fundit për revistën People se ka shmangur “çdo gjë të gjelbër” si pjesë e dietës së saj.
White feston ditëlindjen e saj të 100-të më 17 janar dhe tha se është mirënjohëse që është e shëndetshme.
Duke komentuar dietën e saj, ajo tha se “supozon se funksionon”, duke marrë parasysh vitet që ka jetuar.
“Jam shumë e lumtur që jam me shëndet kaq të mirë dhe ndihem shumë mirë në këtë moshë. Është e mahnitshme,” tha ajo.
White tha se beson se ajo ka lindur si një optimiste, gjë që është thelbësore për natyrën e saj.
“Këtë e kam trashëguar nga nëna ime dhe nuk ka ndryshuar kurrë. Gjithmonë gjej diçka pozitive”, tha ajo.
Me rastin e 100-vjetorit të saj do të prezantohet një dokumentar për jetën e saj dhe më parë aktorja i ka ftuar të gjithë ta festojnë bashkë me të në kinema.
White nuk ka gjasa të luajë në ndonjë projekt së shpejti, dhe sipas revistës People, ajo është e zënë duke bërë një jetë të qetë në Los Anxhelos duke zgjidhur fjalëkryqe, duke luajtur lojëra me letra, duke shikuar dokumentarë me kafshë, si dhe duke luajtur golf.
