Kryeministri Edi Rama paralajmëroi këtë të Enjte mundësinë e shtrëngimit të masave për parandalimin e përhapjes së Covid.
Në konferencën e fundit për këtë vit me gazetarët, Rama tha se duhet të përgatitemi për një valë të re.
Ai përmendi disa vende që kanë shtrënguar masat me qëllim parandalimin e përhapjes së koronavirusit. “Vendimet për mbylljen po merren vend pas vendi. Ne s’do ngutemi, por s’do ta kalojmë sikur s’po ndodh asnjë. Mbase disa masa duhen rimarrë pa shtrënguar zinxhirin e jetës dhe ekonomisë”, deklaroi Rama.
Ai shtoi se vaksinimi nuk po ecën “siç duhet”.
“Paralelisht kemi garantuar gjithë dozat e vaksinave, vaksinimi ecën por jo siç duhet. Një numër i konsiderueshëm njerëz janë vaksinuar jashtë, sidomos ata që kanë lidhje të ngushta me Italinë e Greqinë”, tha kryeministri.
Ndërkohë, natën e ndërrimit të Viteve, Komiteti i Ekspertëve ka njoftuar heqjen e orës policore, duke rekomanduar zbatimin e këshillave për parandalimin e përhapjes së Covid. Ndërsa nga 6 Janari, hyn në fuqi detyrimi për tu vaksinuar për punonjësit e administratës, qendrave tregtare dhe supermarketeve (ose paraqitja e 1 tamponi negativ çdo 5 ditë).
