Sali Berisha foli për çështjen e nxjerrjes së të dhënave personale të qindra mijëra qytetarëve shqiptare.
Në “Intervistë” me Merita Haklajn, në A2 CNN, ish-kryeministri deklaroi se serveri i tatimeve është vjedhur nga eksponentë kryesorë të Partisë Socialiste.
“Nga sistemi që lashë unë, nuk rrodhi qoftë edhe një e dhënë e vetme. Lashë një sistem në tatime që u vodh nga eksponentë kryesorë të Partisë Socialiste me kamera, të regjistruar. Serveri i tatimeve është vjedhja më e madhe që ekziston. Nuk ishte sistem i dobët, por ishin hajdutë të paskrupullt që shkuan dhe vodhën serverin. Prandaj, Edi Rama, me aktet e tij të nxjerrjes së të dhënave personale të shqiptarëve, tregon se është sot njeriu më i padenjë në planet. Kurrë një shtetar, në diktaturë apo demokraci, nuk i lejon vetes një akt të tillë sepse është dhunim flagrant i qytetarëve me të dhënat që ia ke marrë në mirëbesim, si shtet që je”, u shpreh Berisha.
“Edhe të dhënat e patronazhistëve ishin një akt i shëmtuar dhe nuk u bë hetim ndaj këtij krimi monstruoz. Në sistemet informative nuk mund të marrë askush asgjë, pa lënë gjurmë. Nëse është punonjës i sistemit, sa hyrë hyn në sistem, lë gjurmë aty. Nëse “hackers”-at ndërhyjnë, futet siguria kibernetike në këtë çështje. Çdo njeri që i ka nxjerrë, aty e ka emrin. Por, Edi Rama doli me drejtoreshën e AKSHI-t, që të dhënat i përdor në funksion të partisë. Me nxjerrjen e targave, bota e krimit mund të shënjestrojë çdo person që dëshiron”, shtoi Berisha.
Kur u pyet se kujt i leverdiste nxjerrja e të dhënave, Berisha u përgjigj: “Kjo nxjerrje u vendos nga një takim mes Erion Veliajt, Lulzim “Bravës” dhe Taulant Ballës. Pas asaj darke, të pasnesërmen dolën të dhënat në shesh. Ishte një ujdi e Ramës, i cili nuk u takua vetë me “Bravën”, ngarkoi dy të tjerët për të darkuar me të. Por, arrestimi i Lefter Kokës nuk kishte qëllim tjetër vetëm për t’i vënë kapakun një kazani që zien, që është një nga aferat korruptive më të rënda të këtij shteti”.
