Në një kohë kur Komisioni i Rithemelimit të PD i ka lënë një afat deri me 5 janar Lulzim Bashës për të liruar zyrën e Kryetarit të kësaj partie, pas vendimit të Kuvendit të 11 dhjetorit, i cili u ratifikuar edhe nga rreth 44 mijë anëtarë të partisë në referendumin e 18 dhjetorit, që e shkarkonte si kryetar, Basha vijon lëvizjet e tij, duke larguar nga çdo funksion kundërshtarët e tij brenda PD.
Kështu së fundmi raportohet se Lulzim Basha, i cili vijon të sillet si Kryetar, ka larguar si drejtues politik të gjithë emrat që u rrjeshtuan në krah të Foltores së ish-Kryeministrit Berisha.
Nga Edi Paloka, i cili ishte drejtues i PD për qarkun e Durrësit dhe deri te Albana Vokshi e Belind Këlliçi, që ishin drejtues politik në Qarkun e Tiranës, nuk do të jenë më në këto funksione, sipas vendimit të Lulzim Bashës.
E ndërsa ai trajtohet thjesht si një deputet i PD nga Komisioni i Rithemelimit, në anën tjetër Basha sillet si kryetar, duke mos njohur asnjë vendim, qoftë të Kuvendit Kombëtar, ku morën pjesë mbi 4900 delegatë, ashtu edhe 44 mijë votat e demokratëve që e ratifikuan shkarkimin si Kryetar i PD.
Duket se beteja mes Bashës dhe Komisionit të Rithemelimit do të vijojë në janar, atëherë kur skadon edhe afati i vendosur për lirimin e zyrës. Ish-Kryeministri Sali Berisha tha se më 8 janar do të thirret një protestë kombëtare, ndërsa paralajmëroi se 44 mijë demokratët që votuan pro shkarkimit të Bashës, do të jenë në selinë e tyre, nëse nuk ka një reflektim nga ai.
Vendimi, sipas Berishës, do të zbatohet dhe është i pakthyeshëm. Nuk dihet nëse Lulzim Basha do të pranojë të dorëzojë zyrën e kreut të PD-së, por me shumë gjasa ai do të vijojë të mbajë qëndrimet e deritanishme, shpërfillëse ndaj Komisionit të Rithemelimit. Ndaj duket se 8 janari do të jetë dita kur e gjithë situata në PD mund të marrë një zgjidhje lidhur me zyrat dhe selinë e demokratëve, që ka prodhuar jo pak tensione me ndërrime bravash dhe hapjen me forcë të tyre.
IKËN DEGA
Edi Paloka Durrës
Edmond Spaho Korçë
Tritan Shehu Gjirokastër
Bujar Leskaj Vlorë
Aldo Bumçi Tirana 1,12 dhe 14
Agron Shehaj Tirana 5 dhe 7
Albana Vokshi Tirana 9 dhe 11
Belind Këlliçi Tirana 6, 13, 15 dhe 16
Flamur Noka Kamëz, Paskuqan dhe Vorë
