Ish-Kryeministri Sali Berisha pohoi mbrëmjen e së shtunës se përgjegjësia që ai ka lidhur me përplasjet në PD është mos rikthimi i tij në vitin 2017, kur PD humbi zgjedhjet.
Berisha tha se ka përgjegjësi për faktin se nuk llogariti mirë kohën e rikthimit të tij aktiv në PD.
I pyetur se si mund të mundi Edi Ramën, kur nuk po mund dot Lulzim Bashën dhe Gazmend Bardhin, Berisha tha se ka ndjekur çdo hap demokratik dhe statutor për zgjidhjen e situatës.
“Nëse Lulzim Bashës i ka mbetur një nanogram mend në kokë nuk e pret datën 5 janar. Por nëse nuk nuk reflekton, e garantoj se 44 mijë anëtarët e PD, në datën 8 janar, do të marrin në dorëzim selinë e tyre. Ekzekutimi i vendimit është pa apel, e ka vetëm anëtarësia”, tha Berisha. Sipas tij, kjo nuk është vetëm çështje selie, por çështje pluralizmi.
“Ky është revolucion, është uragan. Lulzim Bashën e mbron vetëm Edi Rama, nëse ai do të përballet atëherë revolucioni do përparojë, nuk e ndal dot askush”, tha Berisha.
