Nga BoldNews.al
Brenda pak muajve, Agjencia Kombëtare e Shoqërisë së Informacionit (AKSHI) gjendet në qendër të skandaleve për rrjedhje informacionesh konfidenciale të qindra mijëra qytetarëve shqiptarë.
Pak para zgjedhjeve parlamentare të 25 Prillit 2021, një listë me gjeneralitetet dhe orientimin politik të mbi 900 mijë qyterarëve u publikua në media.
Të dhënat ishin marrë nga një bazë të dhënash e përgatitur nga ‘Patronazhistët” e Partisë Socialiste në pushtet dhe dukej qartësisht se ishin “vjedhur” nga sistemi i Agjencisë Kombëtare të Shoqërisë së Informacionit.
Struktura e Posaçme Kundër Korrupsionit (SPAK), prokurorët e së cilës mbiquhen edhe “heronjtë e fëmijëve në Shqipëri”, e mbylli hetimin penal për këtë mega-skandal qeveritar, duke e konsideruar gjithçka të rregullt.
Pa u tharë mirë boja e këtij vendimi të SPAK, një tjetër rrjedhje gjigande informacioni, kësaj radhe me pagat e qindra mijëra qytetarëve po qarkullon në po aq telefona, nëpërmjet aplikacionit “Whatsapp”.
Edhe kësaj radhe, të gjitha dyshimet rëndojnë tek AKSHI, si përpunues i informacioneve që zotërohen nga Tatimet dhe Sigurimet Shoqërore.
Megjithatë, edhe në këtë rast, ashtu si tek “Patronazhistët”, kryeministri Edi Rama vrapoi që të largojë përgjegjësinë nga vetja dhe qeveria e tij, duke tentuar të minimizojë efektet ortek të këtij mega-skandali, edhe më i rëndë se i pari.
Përtej amortizimit që i bën Rama, duke i sfumuar skandalet edhe me ndihmën e “heronjve të SPAK-ut”, duket qartë që AKSHI ka dështuar një misionin malinj për të “vjedhur” e për të mos fshehur gjurmët.
Ndaj, me shumë mundësi, të gjithë rrufetë e njeriut të gjithëpushtetshëm në Shqipëri mund të bien pikërisht mbi këtë strukturë, e cila menaxhon dhjetra miliarda lekë të buxhetit të shtetit e nuk arrin të fshehë skandalet.
