Policia e Tiranës arrestoi dy persona me dyshimin se kanë falsifikuar aktet noteriale si dhe vulën e një notereje për të përfituar dy sipërfaqe toke në dy zona të ndryshme të kryeqytetit.
Nga informacionet e raportuara, mësohet se të arrestuarit janë R.V, 54 vjeç dhe L.S, 42 vjeç, të dy banues në Kashar. Ndërsa një gjendje të lirë është proceduar edhe një 56 vjeçar.
Mësohet se dokumentet e falsifikuara këta persona i kishin dorëzuar pranë Hipotekës, në mënyrë që në emër të tyre të kalonte edhe sipërfaqja prej 6 mijë metra katrorë tokë e ndodhur në Yzberisht dhe Kashar.
Në bashkëpunim edhe me persona të tjerë, ende të paidentifikuara, ata kanë falsifikuar vulën e një notereje, e cila sapo është njoftuar për këtë veprim ka bërë kallëzim në polici. Hetimet zbuluan se dy personat e arrestuar, si dhe i hetuari në gjendje të lirë i kishin falsifikuar dokumentet me argumentin se pronari i ligjshëm, tokën po ua dhuronte atyre.
Gjatë operacionit u sekuestruan në cilësinë e provës materiale kontratat noteriale të dyshuara të falsifikuara, të cilat ishin dorëzuar në zyrat e Agjencisë Shtetërore të Kadastrës. Të arrestuarit akuzohen për tre vepra penale, “Falsifikimi i dokumenteve”, “Mashtrimi” dhe “Ushtrimi i ndikimit të paligjshëm ndaj personave që ushtrojnë funksione publike”.
