Ish-Kryeministri Sali Berisha duke iu drejtuar pjesëmarrësve në protestën e cila po zhvillohet para Kryeministrisë, tha se ne ngrihemi për interesat jetike të shqiptarëve dhe kombit shqiptar.
“Ne jemi mbledhur këtu për të protestuar kundër aleancës Rama-Vuçiç-Zaev ose aleancës Vuçiç me vasalët e tij me Ramën dhe Zaevin.
Kjo nuk është një protestë kundër bashkëpunimit rajonal, ne mbetemi për një integrime rajonale në kuadrin e integrimeve euro-atlantike.
Kjo është një protestë kundër një projekti që shkon në kurriz të mbarë kombeve të Ballkanit, përveç Beogradit. Ne protestojmë sot kundër një projekti që kundërshtohet nga Bosnja, Mali i Zi dhe Kosova, që është shpallur si kërcënim nga Kroacia.
Një nga dështimet më të mëdha në Ballkan, Europian dhe Botë ka qenë ideja e hegjemonizmit serb në Rajonin tonë. Ky projekt bie ndesh me interesin tonë kombëtar”, tha Berisha.
Sipas tij, në fillim ky projekt nxorri hartat e Rajonit duke fshirë Kosovën si shtet i pavarur.
“Projekti u quajt mini-shengeni, më pas u quajt Ballkani i Hapur, për të nderuar autorin apo propagandistin e shoqërisë së hapur, i cili nuk nguronte të promovonte ndarjen e Kosovës mbi linjat etnike të hapura. Ne protestojmë si shqiptarë kundër mini-Ballkanit, pasi Vuçiç dhe Rama kanë rrethuar Kosovën në një darë armiqësore”, tha Berisha.
Ai e konsideroi projektin e Ballkanit të hapur si një projekt aventurierësh, që kërkojnë të zëvendësojnë nismën e Berlinit.
“Ata nuk flasin për vende të pavarura, për popuj sovranë, nuk flitet për dhunimin e standardeve demokratike në këto vende. Sipas këtyre aventurierëve fajet që ne kemi mbetur jashtë Europës, i ka Europa, pasi ata thonë se Europa dhunojnë qytetarët, opozitat dhe shkelin ligjet”, tha Berisha.
Ai shtoi se Vuçiç ka ardhur në Tiranë si udhëheqës i Ballkanit të Hapur, si udhëheqës i aleacës trilaterale.
“Unë i them që si i tillë nuk do të jetë kurrë i mikpritur në Tiranë, pasi pas nismës së tij qëndron Moska, qëndron ideja që ky Rajon të jetë nën ndikimin e Putinit”, tha Berisha. Ai tha se Ballkani i Hapur do të hidhet poshtë sapo PD të jetë në pushtet.
“Do ta hedhim poshtë me të gjithë vendimet që përmban ai. SHBA mbështesin bashkëpunimin midis vendeve sovrane dhe jo midis vendeve të nënshtruara. SHBAjanë faktor paqeje dhe stabiliteti në Rajon, por Ballkani i Hapur ka vetëm një kumbar: George Sorosin. Me këtë rast i bëj thirrje Kongresit të SHBA, qeverisë së SHBA që të ndalojë çdo dublim të politikës së tyre të jashtme nga George Soros”, tha Berisha.
