Lulzim Basha nga salla e Parlamentit, në një replikë e ministren Elisa Spiropali, u shpreh se Partia Demokratike po pastrohet nga mbeturinat e komunizmit dhe korrupsionit.
Basha tha se PD është e vendosur të lërë pas të shkuarës jo si një parrullë, por me vetëpendesën.
“Ju kërkoni të mbani këtë Shqipëri siç e keni mbajtur deri më tani, vetëm e vetëm që ta trajtoni si plaçkën tuaj. Ju jeni pakica absolute, ju jeni ilegjitimë, ju keni uzurpuar pa asnjë të drejtë vendimmarrjen, ju jeni vrasësin e vërtetë të atyre, fëmijët e të cilëve sot po i mëkoni me shëndetësi falas”, u shpreh Basha.
Ai tha se ajo që po ndodh në PD është legjitimiteti më i lartë i politikës.
“Korrupsioni është armiku numër 1 i mirëqënies së shqiptarëve dhe lufta ndaj korrupsionit është prioriteti numër 1 i Partisë Demokratike. Vettingu i politikanëve lufton korrupsionin dhe tregon se kush nga ne këtu hyri me xhepat bosh dhe sot krekoset me luksin, pasi vodhi paratë nga xhepat e shqiptarëve. Vettingu i politikanëve është rruga e vetme për të ndalur paralizimin e drejtësisë, që Edi Rama nisi ta kapi”, tha Basha.
Ai shtoi se PD synon një proces zgjedhor të parakohshëm, por të bazuar në rregulla të qarta, ku të marrë peshë vota e qytetarëve, ku drejtorët e policisë mos dalin të garantojnë ato që blejnë votat, ku mos kthehen ish-sigurimsat, në emërtimin e patronazhistëve.
Basha tha se legjitimitetin nuk ta japin as paratë e vjedhura, as ato të oligarkëve, as non gratat, as trekndëshi i bermudës. “E vetmja detyrë që ne kemi, është që tua shkurtojmë orët në pushtet një orë e më parë. Për momentin dukeni se jeni mbi kalë, por shumica e shqiptarëve nuk ju shohin me sy. Ne nuk bëhemi fasadë në një Parlament të dalë me paratë e krimit të organizuar”, tha Basha.
