Laçi po bëhet i frikshëm në Kategorinë Superiore. Skuadra e Mirel Josës po mund çdo ekip që i del përpara dhe sot arriti suksesin e katërt radhazi duke mposhtur pa probleme 2-0 Egnatian në Rrogozhinë.
Janë në një formë të jashtëzakonshme kurbinasit dhe duhet pranuar pasi kanë mundur ekipet më të mira deri më sot, Dinamo, Kukësi, Tirana dhe tashmë Egnatian duke arritur në kuotën e 24 pikëve po aq sa Vllaznia dhe Kukësi e 3 më pak se Tirana.
Gjithsesi për t’iu rikthyer analizës së ndeshjes, sfida në “Egnatia Arena” ishte tepër e ekuilibruar në pjesën e pare dhe vetëm në të dytën nisën shkëndijat e mëdha.
Pas shumë tentativave në 75’, Dejan Zarubica, zhbllokon sfidën me një gjuajtje të forte duke çuar në ekstazë miqtë në Rrogozhinë dhe në 88’ vulos gjithçka me golin e bomberit Guindo i cili në fakt mori një top të artë nga Deliu.
Me këtë fitore, Laçi bëhet një pretendent real për titull dhe tashmë kampionati bëhet më I hapur se kurrë.
