U shpall kampion me Partizanin, Ardit Hila “provokon” të kuqtë: E kam gati golin!

Kukësi kërkon patjetër tri pikët me Partizanin këtë fundjavë në Shkodër, teksa një fitore do t’i mbante në vendin e dytë dhe do të vazhdonin presionin ndaj Tiranës kryesuese. Për Ardit Hilën, Kukësi do të hyjë në fushë vetëm për të fituar ndeshjen dhe nuk i kënaqet një barazimi.

Në intervistën e dhënë për “Panorama Sport”, mesfushori elbasanas pohon se për hir të skuadrës dhe për të marrë fitoren është i gatshëm të luajë edhe portier. Sa i përket titullit kampion, ai pohon se të gjithë e duan në Kukës, por është herët për të folur, teksa duhet të shohin vetëm ndeshjen e radhës. Në fund, si një ish i kuq, me të cilin fitoi edhe titullin kampion, ai pohon se me një ekip kampion është e vështirë të bësh krahasime.

Ndeshja ndaj Partizanit- Normalisht presim një ndeshje të vështirë, sepse përballë është një skuadër si Partizani që ka synime këtë sezon. Por, ky kampionat ka treguar se për çdo skuadër, çdo ndeshje është bërë si një finale. Ne do të hyjmë për të marrë maksimumin, pavarësisht se kë kemi përballë.

I kënaqur me barazimin? Jo, jo. Në asnjë ndeshje nuk hyjmë me idenë që do të kënaqeshim me një pikë. Pavarësisht ndeshjes së parë, çdo përballje është histori më vete dhe do të kënaqeshim vetëm me një fitore. Më pas, është fusha ajo që do të tregojë se çfarë rezultati do të marrim.

Sezoni i Kukësit- Të jesh në vendin e dytë në këtë fazë të kampionatit, mund të them se je brenda pritshmërive. E rëndësishme këtë periudhë është që të jesh aty, pak rëndësi ka pozicioni. Sepse, kështu si është kampionati shqiptar, një humbje të zbret poshtë dhe një fitore të çon në vend të parë. Për ne e rëndësishme është që jemi aty dhe që kemi bërë paraqitje të mira.

Kukësi për titull? Kukësi gjithnjë ka synuar të marrë maksimumin në çdo kampionat ku ka luajtur. Në këto 10 vite kështu ka ndodhur, pak rëndësi ka nëse në fund i ka realizuar objektivat apo jo. Besoj se nuk ka njeri që nuk e do titullin, sepse ne si grup kërkojmë maksimumin, por normalisht është shumë herët për të thënë nëse e marrim apo jo. Është shumë rrugë e gjatë përpara. Ne do të bëjmë maksimumin tonë të marrim pikët në çdo ndeshje. Më pas do të shohim se deri ku mund të arrijmë.

Duke marrë shkas nga humbja e penalltisë ndaj Laçit, nëse do t’ju vinte një tjetër mundësi ndaj Partizanit, do të hezitonit?

Sigurisht që nuk do të hezitoja dhe do ta merrja përsipër. Fakti që humba një penallti nuk ndryshon asgjë. Nuk jam as i pari edhe as i fundit që i ndodh kjo gjë.

Sa ka ndryshuar Partizani kur ju dolët kampion, me ekipin aktual që do të përballeni si kundërshtar?

Tani ka kaluar pak kohë, sepse nuk bëhet fjalë për të njëjtin ekip, ku janë larguar dhe afruar shumë lojtarë. Zakonisht me një skuadër që shpallet kampione bëhen krahasimet./Panoramasport