Arrestimi i ish-ministrit të Mjedisit, Lefter Koka, rezulton të jetë vetëm maja e Ajsbergut, pasi emrat që fshihen në thellësinë e dosjes së SPAK, tregojnë implikimin e tyre në çështjen e incineratorit të Elbasanit.
Sipas dosjes hetimore, në lupën e hetimeve janë dhe 7 anëtarët e komisionit të Vlerësimit të Ofertave, të cilët kanë abuzuar me detyrën.
Në lupën e prokurorëve është dhe Sekretari i Përgjithshëm i ministrisë së Mjedisit, Alqi Bllako,dhe ish-ministri i Financave Ahmetaj dhe deri tek anëtarët e tjerë të Këshillit të Ministrave.
Në dosjen hetimore thuhet se implikimi i zyrtarëve, ka nisur në 4 shtator 2014, kur është përpiluar shkresa e parë zyrtare nga Bashkia e Elbasanit që drejtohej nga Qazim Sejdini.
Ky i fundit i drejtohet ministrisë së Mjedisit që drejtohej nga Lefter Koka.
Katër ditë më pas, në 8 shtator 2014, ministria e Mjedisit nëpërmjet sekretarit të Përgjithshëm, dërgon kthim-përgjigje në Elbasan, se është dakord për ndërtimin e një impianti me qëllim prodhimin e energjisë nga mbetjet urbane.
Në datën 14 korrik 2017 regjistrohet si shoqëri tregtare kompania “Albtek Energy” me pronare Stela Gugallja, tashmë e shpallir në kërkim.
Objekti i saj është pikërisht ndërtimi i impianteve të trajtimit të mbetjeve me djegie.
Më 11 gusht 2014, kompania “Albtek Energy” i është drejtuar Ministrisë së Mjedisit me një kërkesë për shprehjen interesit për konçesion në mënyrë vullnetare.
Kompania e specifikon, qartë se kërkon të ndërtojë një incinerator në qytetin e Elbasanit me një vlerë prej 22 milion euro.
Shtatë ditë më pas bashkia e Elbasanit që drejtohej nga Qazim Sejdini, shpall emergjencën mjedisore në fushën e menazhimit të integruar të mbetjeve të qytetit.
Me urgjencë në 14 tetor 2014 ministria e Mjedisit ka urdhëruar ngritjen e komisionit për dhënien e konçesionit për ndërtimin e incineratorit Elbasan.
Kryetar komisioni ishte Pëllumb Abeshi, drejtor i Përgjithshëm në Ministri, Zamir Stefani nga ministria e Ekonomisë, Etleva Kondi nga ministria e Energjitikës, Jonida Zeqo nga ministria e Mjedisit, Lediana Karalliu nga ministria e Mjedisit, Bardhul Çabiri dhe Serafin Papa nga bashkia Elbasan.
Të gjithë kanë firmosur sipas udhëzimeve të mara nga Alqi Bllako dhe ministri Lefter Koka.
Për ironi SPAK tashmë ka arrestuar për “Shpërdorim detyre” ish-ministrin Lefter Koka, ndërsa 7 anëtarët e komisioneve dhe sekretarin e përgjithshëm Alqi Bllakon, nuk është marrë asnjë masë ndaluese. Në rastin konkret gjykata dhe prokuroria vlerësojnë se hetimi është në vazhdim dhe nuk rezultojnë që të jenë mbledhur të gjithë provat.
/Ora News/
