Klodian Zoto, bosi i tre incineratorëve në Shqipëri ka shumë gjasa të jetë larguar dhe nga Gjermania, ku në mesnatën e 1 dhjetorit 2021, ka zbritur në aeroportin e Frankfurtit.
Burime pranë Policisë së Shtetit, të cilat janë ngarkuar nga SPAK për të kërkuar dhe arrestuar Zoton dhe ortaken e tij, Stela Gugallja, u shprehën se, Zoto disponon një pasaportë Portugeze, dokument me të cilin mund të udhëtojë në çdo vend të Evropës dhe botës.
Qysh prej vitit 2004, Klodian Zoto, ka përdorur 4 pasaporta të ndyshme shqiptare, dokumente këto që janë regjistruar të gjitha në sistemin kufitar Shqiptare.
Pavarësisht dyshimeve se Zoto është larguar dhe nga Gjermania, Policia e Shtetit dhe struktura e Posaçme SPAK, nëpërmjet zyrave të marrëdhënies me jashtë, tashmë kanë hyrë në bisedime me partnerët e tyre në Gjermani dhe Austri, me qëllimin e vetëm, lokalizimin dhe arrestimin e Klodian Zotos dhe Stela Gugallja.
Hetimi i SPAK, ka zbuluar se ish-ministri i Mjedisit, Lefter Koka, që u arrestua më 14 dhjetor, dyshohet se ka përdorur një skemë me 8 kompani private për të marrë 3.6 milion euro nga incineratori i Elbasanit, që drejtohet nga kompania koncesionare, “Albtek Energy”. Sipas SPAK, pronarët e këtyre kompanive janë 17 persona, të cilët rezultojnë miqtë e besuar të ish-ministrit Lefter Koka dhe djalit të tij, Arbi Koka.
“Disa nga këto kompani, janë krijuar në të njëjtën ditë, kanë të njëjtin objekt, dokumentet e tyre janë noterizuar tek i njëjti noter, madje kanë të njëjtin ekspert kontabël. Ato janë krijuar dhe pas një ose vetëm disa veprime financiare, e kanë pezulluar statusin e tyre aktiv.
Këto kompani kanë të punësuar një ose dy punëtore dhe nuk e justifikojnë aspak vlerën e transaksionit apo transaksioneve financiare të kryera”-thuhet në dosjen e SPAK. Ndërsa më tej në dosje flitet edhe për kompaninë koncesionare “Albtek Energy”, ku sqarohet se: “kapitali themeltar i kësaj shoqërie në fillim ishte vetëm 100.000 leke dhe numri i punonjësve të saj në momentin e paraqitjes së ofertës në datë 16 dhjetor 2014, ishte vetëm 2 persona”.
/Ora News/
