Sabien Lilaj do largohet në merkaton e janarit nga Prishtina pas 1 viti e gjysmë. 32 vjeçari denoncoi mungesën e pagave prej katër muajsh në Superligën e Kosovës, teksa vetëm zyrtarizimi mungon për largimin e mesfushorit nga kampionët e Kosovës.
Tanimë për lojtarin e lindur në Maliq kanë nisur “thashethemet” e merkatos, me skuadrat elitare në Shqipëri si Partizani dhe Tirana që kanë shprehur interes për të. Ish-lojtari i Kombëtares shqiptare ka një të kaluar në elitën tonë me Tiranën, Skënderbeun dhe Kukësin, ndërsa është produkt I akademisë bardheblu.
Pritet që janari të jetë I nxehtë për skuadrat e kryeqytetit, me Lilaj që do ishte një opsion i mirë në një periudhë që gjetja e lojtarëve kualitativ është e vështirë. Me Shqipërinë, Lilaj ka zhvilluar 17 paraqitje, teksa ka fituar pesë tituj me Skënderbeun mes viteve 2012-2016.
