Mazhoranca rrëzoi dekretin e Presidentit Ilir Meta i cili kishte kthyer për rishqyrtim ligjin për bashkëqeverisjen. Për shumicën, kreu i shtetit e ka bërë pjesë të rutinës së tij kthimin e akteve të rëndësishme, ndërsa opozita paralajmëroi ankimim të nismës në Gjykatën Kushtetuese.
Pa surpriza, Komisioni i Ligjeve rrëzoi dekretin e presidentit Ilir Meta për bashkëqeverisjen. Nisma ligjore nuk kishte marrë pëlqimin e presidentit dhe argumentet me shkrim ia tha edhe në sy deputetëve.
“Ligji jo vetëm nuk plotëson apo nuk sjell ndonjë risi në kuadrin legjislativ, por përkundrazi e deformon atë, si dhe rrezikon instrumentalizimin e këtij institucioni duke dubluar, mbivendosur strukturat të tjera shtetërore”, tha këshilltari i presidentit, Bledar Dervishi.
Qasja presidenciale nuk bindi mazhorancën, e cila vijon ta shohë kreun e shtetit me skepticizëm.
“Tashmë një rutinë konstante fatkeqësisht për çdo projektligj të rëndësishëm që përcillet për dekretim. Ne besojmë se të gjitha pretendimet dhe arsyet e kthimit të ligjit janë të pabazuara”, tha ministrja e Shtetit për Marrëdhëniet me Parlamentin, Elisa Spiropali .
Përplasja e argumenteve Presidencë-Qeveri nuk kaloi pa qëndrimin e opozitës. Oerd Bylykbashi u shpreh se kjo nismë duhet të ankimohet në Gjykatën Kushtetuese dhe se anëtarët e saj nuk duhet të stepen përpara qeverisë.
“Ne nuk kemi sot mundësinë që pesë me katër të vendoset nëse një ligj është antikushtetutës apo jo. Aq më tepër që i kanë ende kërcinjtë e këmbës shumë të dobët. Uroj që këtë ligj mos ta çojnë në Komisionin e Venecias, por të kenë guximin, përgatitjen si gjykata më e lartë, ta marrë në shqyrtim dhe ta rrëzojë”.
Në finale, votat u ndanë, tre opozitarë në sallë ishin pro dekretit të Presidentit, ndërsa mazhoranca me kartonët e saj rrëzoi të gjitha pretendimet e kreut të shtetit.
