Prokuroria e Posaçme është përfshirë në konfliktin mes dy grupeve në Partinë Demokratike.
Këtë të Hënë, “grupi i Bashës” ka kallëzuar në SPAK 3 deputetë, Belind Këlliçin, Edmond Spahon dhe Albana Vokshin, si edhe Ivi Kason e Ervin Minarollin. Ata akuzohen për veprën penale të “Falsifikimi i vulave, i stampave ose i formularëve” i kryer në bashkëpunim.
Në kallëzim drejtuar SPAK-ut thuhet se ata “janë persona që kanë patur funksione në PD, kanë dijeni për rregullat e statutit, dhe e kanë kryer veprën penale të përdorimit të vulës dhe simboleve për të realizuar qëllimet e tyre, pavarësisht se ishin në dijeni të pasojave ligjore”.
Kujtojmë se Kuvendi i PD-së zhvilluar në “Air Albania” më 11 Dhjetorr votoi shkarkimin e Lulzim Bashës nga drejtimi i PD-së. Nga ana tjetër, Basha deklaroi se nuk i njeh vendimet e kuvendit dhe njoftoi shkarkime nga funksionet e partisë të mbështetësve të këtij Kuvendi.
