Kukësi ndalet sërish në Superiore. Në javën e 13-të, skuadra e Diego Longos e cila vinte pas një humbje me Laçin, u ndal në një barazim zhgënjyes ndaj Teutës në ndeshjen e luajtur në “Elbasan Arena”.
Të dyja ekipet kishin nevojë për fitore por tashmë duhet të mjaftohen me një barazim teksa në fushë nuk munguan mundësinë e shënimit.
Në të 8’, verilindorët gjetën rrjetën por që u anulua me VAR për pozicion të parregullt të Gj. Taipit teksa në 19’, Teuta iu kundërpërgjigj me një rast të Giorgiev të ndalur ne fund nga Marku.
Sërish verilindorët gjejnë rrjetën në 22’ dhe sërish VAR e anulon për pozicion të parregullt, kësaj radhe nga Marku. E menjëhershme ishte edhe përgjigja e durrsakëve me Vilën që godet shtyllën në 25’.
Një tjetër shtyllë goditet në sekondat e fundit të pjesës së parë nga Kukësi, kësaj radhe ishte kroati Basa i cili nuk mundi të gjente rrjetën.
Fraksioni i dytë i ndeshjes më i ekuilibruar dhe skuadrat tregohen më të kujdesshme ndonëse Taipi u tregua disa herë i rrezikshëm për ekipin e Longos.
Gjithsesi ndeshja mbyllet në një barazim pa gola që nuk kënaq asnjë prej ekipeve e në fakt më e fituara është Tirana që mund të shkëputet nëse fiton me Laçin.
