Në stadiumin “Air Albania”, ditën e sotme -11 dhjetor, do të mbahet Kuvendi Kombëtar i PD-së. Kuvendi është planifikuar të fillojnë në orën 10:00.
Në fazën e parë të këtij Kuvendi do të bëhet konfirmimi i firmave të delegatëve që duan të thirret Kuvendi.
Më pas do të verifikohet numri i 4200 firmave për të nisur punën ky Kuvend.
Organizatorët kanë bërë një kartë dhe një bar code me të cilin synohet të verifikohet anëtarësia.
Do të hidhen për votim dhe ndryshimet statutore mes tyre dhe neni i quajtur “Basha” ku thuhet se në rast të humbjes së zgjedhjeve parlamentare kryetari i partisë largohet menjëherë.
Një tjetër pikë është dhe fakti se sot do të hidhet dhe shkarkimi i zotit Basha. Parashikohen disa orë Kuvend e këto ndryshime të rëndësishme do të shoqërohen edhe me fjalime politike.
Më pas Kuvendi pritet të zhvendoset në selinë e PD-së, ka njoftuar më herët Floriana Garo, drejtoresha e komunikimit të “Foltores”.
Një ditë më parë, lideri historik i PD Sali Berisha kërkoi që të gjithë të bashkoheshin në këtë Kuvend, por Sekretari i Përgjithshëm i PD Gazment Bardhi tha se forumi më i lartë drejtues i ligjshëm është ai që do të mblidhet në datën 18 Dhjetor, i iniciuar nga kryetari dhe i thirrur nga Kryesia.
