Ish-Sekretari i Përgjithshëm i PD, Arben Ristani komenton zhvillimet brenda PD, pas Kuvendit Kombëtar që miratoi statutin e ri dhe shkarkoi Lulzim Bashën.
Komisioni për Rithemelimin me 29 anëtarë do të shkojë në selinë e PD që nesër, tha Ristani, ndërsa shtoi se qëndrimi i Bashës në zyrë është i paligjshëm.
“Për herë të parë janë mbledhur 5 mijë delegatë. Herët e kaluar është gënjyer, sepse salla e Pallatit të Kongresve nuk merr më shumë se 2 mijë anëtarë, edhe pse thoshin që kaq janë brenda, të tjerët janë te lulishtja. Ka qenë hile djallëzore, pikërisht për të mos u mbledhur kurrë një Kuvend i këtyre përmasave. Ia dolëm. Jam i mbushur me atë që ka ndodhur sot aty. Ne morëm vendim për të shkarkuar Kryesinë, zotërinjtë ishin të zgjedhur jo me votim të fshehtë. U ndërtua një Komision Themelimi i përkohshëm, deri në përfundimin e zgjedhjeve për kryetar të PD. Ka kompetencat e Kryetarit dhe Kryesisë. Do të bëhet një referendum në datën 18 dhjetor. Shumica dërrmuese, afër shumicës absolute e shkarkuan Bashën. Vendimmarrja e Kuvendit është e tillë që tashmë organi i vetëm drejtues i PD është Komisioni i Rithemelimit. Procedurën e referendumit do ta organizojë ky Komision. Në seli ky komision do të hyjë që nesër. Do të mblidhemi për të shqyrtuar situatën. Duhet filluar punë sepse koha është shumë e shkurtër”.
“Që nga momenti i shkarkimit, ai është i paligjshëm me qëndrimin e tij në zyrë. Dhe për ta vendosur çështjen në ligjshmëri shteti ka edhe mënyrat represive. Do t’i drejtohemi qoftë policisë, për ta liruar, sepse nga sot është pushtues i godinës së PD. Nëse do të ketë pengesë do të përdoren edhe metoda të tilla”.
