Takimi i G7-ës, ku mori pjesë personalisht Sekretari amerikan i Shtetit, Antony Blinken dhe homologët e tij nga Franca, Italia, Gjermania, Japonia dhe Kanadaja, vjen teksa ka shqetësime në rritje se Rusia mund të pushtojë Ukrainën. Ndërkohë, Rusia mohon planifikimin e ndonjë sulmi mbi vendin fqinj.
Në takimin në Liverpool ishte i pranishëm edhe shefi i politikës së jashtme të BE-së, Josep Borrell. Sekretarja e Jashtme e Mbretërisë së Bashkuar Liz Truss kërkoi në këtë takim që vendet evropiane të heqin dorë nga gazi rus.
Ndërsa ministrja e Jashtme gjermane tha se vendet ranë dakord se për të zgjidhur krizën palët duhet të kthehen në tryezën e bisedimeve.
“Ne duhet të ndërmarrim çdo veprim për t’u kthyer në dialog,” u tha Baerbock gazetarëve.
Amerikanët ndërkaq i kanë paralajmëruar rusët se do të ketë pasoja të rënda nëse ata ndërhyjnë ushtarakisht në Ukrainë. Sipas tyre, Rusia ka rritur prezencën ushtarake në kufi me Ukrainën.
Rusët në krahun tjetër akuzojnë amerikanët dhe aleatët se kanë rritur gjithnjë e më shumë shitjet e armëve dhe pajisjeve ushtarake në Ukrainë në vitet e fundit dhe po kërkojnë të vendosin më shumë sisteme raketore pranë kufijve të Rusisë.
