Ambasadorja amerikane në Tiranë Yuri Kim ka reaguar pas vizitës së djeshme zyrtare në Shqipëri të Gabriel Escobar, zv.Ndihmës Sekretari i Shtetit të SHBA i Dërguari i Posaçëm për Ballkanin Perëndimor.
Në një postim në Twitter, Kim shkruan:
“Gjatë vizitës së tij në Tiranë, zv.Ndihmës Sekretari Escobar falënderoi Shqipërinë për partneritetin e fortë dhe ripohoi mbështetjen e fortë të SHBA për anëtarësimin në BE. Ai nënvizoi fokusin e SHBA-ve në luftën kundër korrupsionit, mosndëshkimit dhe përpjekjeve për të minuar demokracinë në Ballkanin Perëndimor.
Ne mezi presim të forcojmë marrëdhëniet me Shqipërinë për rritjen e bashkëpunimit në fushën e mbrojtjes si aleatë të NATO-s; krijimin e më shumë mundësive për tregti dhe investime; duke punuar së bashku për integrimin rajonal dhe çështjet globale, veçanërisht si anëtarë të Këshillit të Sigurimit të OKB-së në 2022”.
Escobar u takua dje me kryetarin e PD-së Lulzim Basha, ministren e Mbrojtjes Olta Xhaçka dhe kryeministrin Edi Rama.
