8 Dhjetori, Berisha rikthehet në Qytetin Studenti. Basha e kujton te ArTurbina

Më 8 dhjetor 1990 nisi lëvizja studentore, e cila konsiderohet si goditja më e fortë që iu dha diktaturës komuniste dhe që pasoi me protesta të fuqishme që çuan në rrëzimin e sistemit diktatorial.

Mijëra studentë dhe banorë të Tiranës 31 vjet më parë u bashkuan në Qytetin Studenti, atje ku 3 ditë më pas u themelua edhe partia e parë opozitare, Partia Demokratike.

Sot kujtohet 8 dhjetori, e emërtuar si Dita e Rinisë në Shqipëri, një datë e shënuar, por për të cilën flitet pak, aq sa brezi i ri, qofshin edhe studentët e sotëm, e konsiderojnë thjesht si një festë, ndërsa realisht është një datë historike.

Ndër vite, drejtues të PD-së e kujtojnë 8 dhjetorin e 1990 me takime në qytet Studenti, vendi ku dhe studentët u ngritën të bashkuar dhe u bënë iniciatorë e protagonistë të kthesës së madhe historike: protestave paqësore që sollën pluralizimin, rënien e komunizmit dhe lindjen e demokracisë.

LEXO EDHE  SPAK pushon hetimet për shtatë ish-zyrtarë të lartë të drejtësisë

Ky është një vit ndryshe për demokratët ku prej muajsh vazhdojnë të jenë në një krizë politike të brendshme, ku ish lideri historik Sali Berisha kërkon që të rikthejë PD në nivelet e mëparshme duke thirrur Kuvendin kombëtar me 11 dhjetor ndërsa nga ana tjetër kryedemokrati e quan të paligjshëm këtë kuvend, dhe ka thirrur Kuvendin e PD-së me 18 dhjetor.

Ndërkohë duket se dhe dita e Rinisë, dy figurat kryesore të PD-së do t’i gjejë të ndara. Kryetari aktual Lulzim Basha ka bërë me dije se me më 8 dhjetor do të zhvillojë një takim në ambjentet e ArTurbinës, ndërkpohë Sali Berisha ka bërë me dije se një orë më pas do të jetë në qytet Studenti ku do të zhvillojë takim dhe homazhe tek shtatorja e Azem Hajdarit.